ازيا تاەكۆوندوشىلارى اتىراۋعا كەلدى

اتىراۋ قالاسىندا بۇرىن-سوڭدى بولماعان ءدۇبىرلى دودا جالاۋىن كوتەردى.

تاەكۆوندودان جاستار اراسىنداعى ازيا چەمپيوناتى، جالپى وليمپيادالىق سپورت تۇرلەرىنەن اتىراۋ قالاسىندا العاش رەت حالىقارالىق جارىس وتۋدە. قۇرلىق بىرىنشىلىگىنە 25 ەل وكىلدەرى جينالعان.

19-24 ءساۋىر ارالىعىندا اتىراۋ حالقىن ىمىراسىز باسەكەلەر مەن قىزىقتى قويىلىمدار كۇتىپ تۇر. بۇگىن اتىراۋ قالاسىن، جالپى قازاقستاندى تانىستىرۋ ماقساتىندا جارىس ۇيىمداستىرۋشىلارى «Welcome party» كەشىن وتكىزدى. كەشكە بۇكىل الەمدىك تاەكۆوندو فەدەراتسياسىنىڭ پرەزيدەنتى، بەلگىلى سپورت ماماندارى قاتىستى.

«بىرنەشە جىلعى تاجىربيەمدە بۇنداي كەرەمەت كەشتى ءبىرىنشى رەت كورىپ وتىرمىن. تاەكۆوندوشىلار ادەتتە بۇنداي كەشتەردى كوپ كورە بەرمەيدى. كونتسەرتتىك باعدارلاما دا ويلاستىرىلىپ جاسالعان ەكەن. قالاعا كەلگەنىمە ەكى-اق كۇن بولسا دا ءوز ەلىمىز سياقتى ۇيرەنىپ كەتتىك. ءبىزدى مۇندا كەرەمەت كۇتۋدە»، — دەيدى قىتايلىق تايپەي ەلىنىڭ جاتتىقتىرۋشىسى.

بۇگىنگى تاەكۆوندوشىلار كەشىندە ۇلتتىق ونەر كورسەتىلدى. دومبىرا تارتىلىپ، بي بيلەندى. يبراگيم ەسكەندىر كەلىپ «كوك تۋدىڭ جەلبىرەگەنىن» شىرقادى. ارينە بەشبارماقسىز قازاق توي وتكىزبەگەن. كەلگەن قوناقتارعا ۇلتتىق قۇندىلىقتارىمىز كورسەتىلدى.