Rústem MUQATOV: «Men jastarǵa qoldaý kórsetýge daıynmyn!»

Sońǵy kezderi qazaq sportynyń damýy úshin qoldan kelgen kómekterin aıamaıtyn sport janashyrlarynyń qatary kóbeıip keledi. Bizdiń búgingi keıipkerimiz de sondaı úlken júrekti azamattardyń biri, esimi alty Alashqa tanymal kásipker, sport pen óner jáne ult janashyry – Rústem Muqatov. Bir emes, birneshe kompanııanyń ıesi jáne quryltaıshysy Rústem Ábdikárimulynyń jumys kestesi óte tyǵyz eken. Únemi shetel men elimizdiń ár óńirinde issaparada júretin azamatpen kezdesýimiz de ońaı bolǵan joq. Degenmen, jaqynda sáti túsip kezdesip, az-kem suhbattasyp úlgirdik. Sol ashyq-jarqyn áńgimeni nazarlaryńyzǵa usynyp otyrmyz. 

–Rústem Ábdikárimuly, aldymen ózińizdi oqyrman qaýymǵa qysqasha tanystyrsańyz.

–Meniń týyp-ósken jerim Almaty qalasy. Osy jerde ósip-ónip, el úshin qyzmet atqaryp júrgen jaıym bar. Jumys babymen elimizdiń barlyq óńirinde jáne shetelderde bolyp turamyn.  Qaıda júrsem de men eshqashan, elge, jerge, rýǵa bólinip kórgen emespin. О́zimdi qazaqpyn, Qazaq eliniń azamatymyn dep esepteımin.

Bizdiń kompanııa kópsalaly. Bizde 600-den astam adam jumys isteıdi. Biz qurylyspen de, NOÝ-HAÝ, HI-TECH jáne ID tehnolgııalarmen, jalpy biraz nárselermen aınalysamyz. Múmkindigi shekteýli adamdardy qoldaýǵa arnalǵan qorǵa únemi kómektesip turamyz.

–Demeýshilikpen  aınalysýyńyzǵa ne sebep?

–Sport salasyna kóńil bólip, qoldaý kórsetýdegi basty maqsatym – jastarǵa kómektesý. О́ıtkeni, olar eldiń bolashaǵy. Bizder sekildi bıznes salasynyń ókilderi úkimetimizge kómektesip, jas urpaq tárbıesimen aınalysýǵa, olardyń sportpen jáne basqa da qalaǵan isterimen shuǵyldanýyna qoldaý kórsetýimiz qajet. Allaǵa shúkir, sońǵy kezderi jastar arasynda sportpen aınalysyp, salamatty ómir saltyn ustanýshylar sany artyp keledi. Bireýler sportpen, bireýleri bımen, endi bireýleri shyǵarmashylyqpen aınalysady. Olarǵa qarap otyryp, bir jaǵynan qyzyǵasyn da. О́ıtkeni, búgingi kún olardyń ózderiniń súıikti isterimen aınalysýyna barlyq jaǵdaı men múmkindik bar. Al bizdiń kezimizde olaı bolǵan joq. Qazirgi jastar kezinde biz jetpegen bıikterge jetse, elin-jerin súıetin azamat bolyp shyqsa degen oı meni osy salaǵa qoldaý kórsetýge alyp keldi.

–Sizder birneshe sport keshenderin salǵan ekensizder. Sol jóninde aıtyp berseńiz?

–Endi biz ana jerde saldyq, myna jerde saldyq desek maqtanǵandyq bolyp ketetin shyǵar dep oılaımyn. Qolymyzdan kelgenshe el ıgiligi úshin sport nysandaryn salyp jatyrmyz. Búgingi tańda batys óńirde sport alańdaryn, grek-rım kúresi zaldaryn salyp otyrmyz. Alla qalasa, aldaǵy ýaqytta elordamyzda, Almatyda salǵaly jatyrmyz. Ol sport keshenderin salyp, sosyn talantty bapkerlerdi, onyń ishinde jastardy tárbıelep, oqytý josparda bar. Olar óz kezeginde jastardy sportqa baýlyp, jas urpaqty salamatty ómir saltyn ustanýǵa jaqsy nasıhat bolady.

–Siz negizi sporttyń qaı túrine kóbirek qoldaý kórsetesiz? Qupııa bolmasa sol jaǵyn bilýge bola ma?

–Men negizinde grek-rım kúresine kóbirek qoldaý kórsetemin. Onyń bir sebebi, ákem kezinde balýan bolypty. Biraq, ol kisi erkin kúrespen aınalysqan kórinedi. Osydan keıin shaǵyn fýtbolǵa da qoldaý kórsetemin. Arasynda ózimizdiń de dop teýip, ústel tennısin oınap qoıatynymyz bar. Sportpen kóbirek shuǵyldanýǵa ýaqytymyz bola bermeıdi. Sonda da sál múmkindik týa qalǵan jaǵdaıda sport zaldan tabylyp turýǵa tyrysamyn.

–Únemi sportqa qoldaý kórsetip otyrǵandyqtan, sportshylar arasynda dostaryńyz da kóp shyǵar? Olardyń ishinen kimderdi erekshe atap óter edińiz?

–Allaǵa shúkir, kóptegen sportshy jigittermen aralasamyn. Biraq, olardyń arasynan mynaýmen aralasamyn dep eshqaısysyn bólip-jarǵym kelmeıdi. «Bólingendi bóri jeıdi» deıdi ǵoı bizdiń qazaqta, sol sebepti eshkimniń atyn atap, túsin tústemeı-aq qoıaıyn. Shúkir dostarym barshylyq.

–Sportshy bolamyn degen jastarǵa qandaı tilegińiz bar?

– Sport jolyn tańdaǵan jastarǵa aıtarym, eshqashan erinbeńizder! Árbir jeńis pen tabys mańdaı termen keledi. Tańdaǵan joldaryńyzdan qaıtpańyzdar! Aldyna naqty maqsat qoıǵan adam – sol maqsatyna mindetti túrde jetedi. Jeńisti kúnderimiz kóp bolsyn! Aldymyzda kele jatqan Tokıo Olımpıadasynda kók týymyz kókke kóterilip, Ánuranymyz shyrqalady degen oıdamyz. Sol qýanyshty, jeńisti kúnde kezdeseıik! Alǵa  Qazaqstan!

–Áńgimeńizge rahmet! Sizge de el úshin atqaryp júrgen árbir isińizge tabys tileımiz!

Áńgimelesken,

Musaǵalı TASQALIEV

 ALMATY – AQTО́BE