الماتىدا جاڭا سۋالىبى اشىلدى

ەلىمىزدە سۋ سپورتىنان ۇلتتىق قۇراما كوماندا مەن جەكەلەگەن كلۋبتاردىڭ الەم ارەناسىنا اتويلاپ ءوزىن تانىتۋ ءۇشىن سپورتتىڭ وسى تۇرىنەن حالىقارالىق ستاندارتقا ساي الاڭدار سالىنۋى كەرەك. بۇگىنگى كۇنى سپورت كەشەندەرى ەلىمىزدىڭ ءار ايماعىندا كوپتەپ  اشىلىپ جاتىر. ول ارينە، قۋانارلىق جاي، جوق دەۋگە اۋزىمىز بارماس. دەگەنمەن ءجاسوسپىرىم بالالاردى سۋ سپورتىنا قىزىقتىرا بىلۋگە كەلگەندە نە ىستەپ جاتىرمىز؟ – دەگەن سۇراقتى وزىمىزگە قويىپ كورەلىك.

ءيا، سپورت مەكتەپتەرىندە سۋ سپورتىنان ۇيىرمەلەر جۇمىس ىستەيدى. ال، سول سۋ  سپورتىنا قادام باسىپ كەلگەن بالالار قانداي جاعدايدا جاتتىعا الادى؟ وسى ماسەلە وزەكتىرەك دەپ ويلايمىن. جاستاردان ناتيجە تالاپ ەتۋ ءۇشىن الدىمەن جاعداي تۋعىزۋدى ءبىز كەيدە ارتقا تاستاپ قويامىز. نەگىزى ول دۇرىس ەمەس. ول ءۇشىن زاماناۋي تۇرعىدا كەشەندى سۋ سپورتىنىڭ الاڭدارى تۇرعىزىلۋى قاجەت. بۇل تۇرعىدا الماتىداعى  كاركەن احمەتوۆ اتىنداعى وليمپيادا  رەزەرۆىنىڭ  رەسپۋبليكالىق  مامانداندىرىلعان مەكتەپ-ينتەرنات كوللەدجىن كوپكە ۇلگى ەتىپ ايتۋعا بولادى. مۇندا ءجاسوسىپىرىم تالانتتار ءۇشىن بار جاعداي جاسالعان. قايسىبىر سپورت زالدى الىپ باس سۇعىپ قاراساق، سول سپورت تۇرىنە ارنالعان ينۆەنتارلارمەن جابدىقتالعان. دزيۋدو اكادەمياسى ءوز الدىنا ءبىر توبە. سول سپورت زالداردا شۇمەكتەپ تەرىن توككەن دارىندى بالۋان ەلدوس سمەتوۆ وليمپيادانىڭ كۇمىس جۇلدەسىن جەڭىپ الىپ، ەلىمىزدى ءبىر قۋانتقانى ءالى ەسىمىزدە.

ەلدوس وسى كيەلى مەكتەپتىڭ ءتول تۇلەگى. سونىمەن قاتار مەكتەپ وزگە سپورت تۇرلەرىنەن دە ەلىمىز بويىنشا توپجارىپ ۇزدىكتەر قاتارىندا كەلەدى. مىسالى، سۋ سپورت تۇرلەرىنە ارنالعان سۋ جاڭا سۋالىبىن تىلگە تيەك ەتىپ ايتساق، بۇل سپورت تۇرىندە وسى مەكتەپتىڭ جاس قىراندارى حالىقارالىق جارىستاردا ەل قورجىنىنا جۇلدە سالىپ ءجۇر. مىسالى، بيىلعى جىلى ءساۋىر ايىندا رەسەيدىڭ قازان قالاسىندا ۇيلەسىمدى جۇزۋدەن وتكەن الەم كۋبوگىنىڭ كەزەڭىندە جەكە، دۋەت، ارالاس دۋەت جانە حايلايت تۇرىندەگى سىندار بويىنشا ك.احمەتوۆ مەكتەپ-ينتەرنات كوللەدجدىڭ دارىندى سپورتشىلارى 7 التىن، 7 قولا مەدال جەڭىپ العان ەكەن. بۇل جەتى قىزدىڭ جەتى التىن، قولا جۇلدەسى قازاقستاننىڭ دا سۋ سپورتى تۇرىنەن الەمدەگى كوشباسشى مەملەكەتتەرمەن تەرەزەسى تەڭدەي ونەر كورسەتە الادى دەگەن ءسوزدى بىلدىرەدى. «قىران بالاپانىن ۇياسىندا باپتايدى» دەسەك، سۋ سپورتىنىڭ سۇلەيلەرىن سۋدا شىڭداپ جاتتىقتىرىپ الامان جارىستاردان قالدىرماعان ابزال. بالالار جارىس ارقىلى وسەدى. سوندىقتان دا جاس سپورتشىلاردىڭ ودان جوعارى الەم، وليمپيادا ويىندارىندا تابىستى ونەر كورسەتۋلەرى ءۇشىن الدىمەن جاعداي تۋعىزۋ كەرەك ەكەنىن جاقسى بىلەتىن، ك كاركەن احمەتوۆ اتىنداعى وليمپيادا  رەزەرۆىنىڭ  رەسپۋبليكالىق  مامانداندىرىلعان مەكتەپ-ينتەرنات كوللەدجىنىڭ ديرەكتورى سەيىلحان قاراقوۆ  سۋ جاڭا سۋالىبىنىڭ قۇرىلىسىن جاساپ ءبىتىپ قولدانىسقا بەرىپ وتىر.

جەتكىنشەكتەرىنىڭ جەڭىستى جولىن كۇنى بۇرىننان ويلايتىن جاناشىر باسشى، ىسكەر ازامات سەيىلحان باقتىعالي ۇلىنىڭ  تىنىمسىز ارەكەتتەرى جەمىسىن الداعى ۋاقىتتا ءسوزسىز بەرتىنىنە بەك سەنىمدىمىن. ويتكەنى، قولداۋ، قامقورلىق باردا ناتيجە دە كوپ كۇتتىرمەيدى.  ايتۋلى مەكتەپتىڭ تولاعاي تابىستارى بىلىكتى باسشىلىقتىڭ بىلگىر مامانداردى جانىنا ايرانداي  ۇيىتا بىلۋدەن دە شىعار دەگەن ويدا قالاسىڭ. ايتالىق قازاق سپورتىنىڭ دامۋىنا  عىلىمي تۇردە كوپتەگەن مەتوديكالىق وقۋ-قۇرالدارىن جازىپ  شىعارعان ءاناتولى قۇلنازاروۆ سەكىلدى اقسامايلى اعامىز بۇگىندە ومىرلىك تاجىربەسىن جاس دارىندى سپورتشىلارعا ايتىپ، مەكتەپتىڭ ابىرويىن كوتەرۋگە ۇلەسىن قوسىپ ءجۇر. جاستاردىڭ اعا بۋىننان الارى  كوپ. ال، ەندى سۋ جاڭا سۋالىبىنىڭ بۇگىنگى كورىنىسىنە قايتا ورالساق. كەزىندە توزىعى جەتىپ، سۋى تازارىپ كورمەگەن سۋالىبى بۇگىندە تۇگەلدەي قۇرىلىسى جاڭارىپ، جاڭا زامانعا ساي جاڭا تەحنولوگيالىق تازارتۋ قۇبىرلارى قويىلعان ەكەن. سۋ اۆتوماتتى تۇردە تازارتىلىپ، ادام دەنساۋلىعى ءۇشىن پايدالى قوسپالار قوسىلىپ سۋالىبى تاۋ سۋىنداي ءمولدىر تازا كۇيگە ەنگەن. قازىرگى كۇنى ەندى عانا قولدانىسقا بەرىلگەلى وتىرعان سۋ جاڭا بۇل ورىن حالىقارالىق ستاندارتقا ساي سپورت الاڭىنا اينالعالى تۇر. كورسەڭ كوزدىڭ جاۋىن الاتىن بۇل سۋالىبىندا سۋ دوبى، ءجۇزۋ، ۇيلەسىمدى ءجۇزۋ سەكىلدى سپورت تۇرلەرىنەن جاس تالانتتار قۋانا سۋعا سۇڭگىپ جاتتىعۋلارىن  جاقسى كوڭىل كۇيمەن جالعاستىراتىن بولادى. بۇل جەردە جاتتىعاتىن سپورتىشلار جەڭىستەردەن كورىنبەۋى مۇمكىن ەمەس. ويتكەنى، سۋدىڭ ءوزى «كەل، ءتۇس، سۇڭگى ءجۇز، جالىقپا جاس ورەن»، دەپ شاقىرىپ تۇرعانداي.

اقىن ورداباي ۇلى،

الماتى