ەلگە بارعان ءبىر ساپار

№ 34 كەنەن اۋىلدىق كىتاپحاناسىندا «بالا كۇنگى ءبىر كىتاپ» جوباسى اياسىندا  اۋىلداس اعامىز، قازاقستان جازۋشىلار وداعىنىڭ جانە قازاقستان جۋرناليستەر وداعىنىڭ مۇشەسى ، سەيداحمەت بەردىكۇلوۆ اتىنداعى سىيلىقتىڭ لاۋرەاتى، ياحونتوۆ اتىنداعى حالىقارالىق «ءسوز ونەرى» بايقاۋىنىڭ جۇلدەگەرى (لەنينگراد – 1989)، دۇنيەجۇزىلىك قازاق كۇرەسى فەدەراتسياسى رەۆيزيالىق كوميتەتىنىڭ توراعاسى، تۇڭعىش رەت قازاق كۇرەسىنەن اشىلعان ينتەرنەت سايتتىڭ اۆتورى، قازاق كۇرەسىن  باق اراسىندا دامىتۋ جولىنداعى ەڭبەگى ءۇشىن مەدالىن تۇڭعىش العان جۋرناليست،  جەلتوقسانشى  اقىن  ورداباي ۇلىمەن كەزدەسۋ كەشى بولىپ ءوتتى.

كەزدەسۋگە كەنەن اۋىلدىق اكىمشىلىگى قىزمەتكەرلەرى، № 42 ورتا مەكتەپ ديرەكتورى  ع. بايگەلوۆا، ك.ازىرباەۆ مەموريالدىق مۋزەيىنىڭ ادىسكەرى  م.كەنەنوۆ، مادەنيەت ءۇيىنىڭ قىزمەتكەرلەرى شاقىرىلدى. اقىن اعا  وزىنىڭ بالا كۇنگى وقىعان س. مۇقانوۆتىڭ «بالۋان شولاق» پوۆەسى تۋرالى اڭگىمەلەپ، بالالارعا وقۋعا كەڭەس بەردى. بالا كەزىندە كەنەن اتادان جانە قازاقتىڭ  اقىن قىزى ف.وڭعارسىنوۆادان قالاي باتا العاندىعى تۋرالى قىزىقتىرا  اڭگىمەلەدى. بالالاردىڭ سۇراقتارىنا جاۋاپ بەرىپ، كىشى بۋىن جاستارعا پاتريوتتىق رۋح بەرىپ، ادامگەرشىلىك قاسيەتتەر جايلى ءسوز قوزعادى.  اعامىزدىڭ تاعى ءبىر قىرى بالا كەزىنەن ءان سالادى ەكەن. قازاقتىڭ قارا دومبىراسىمەن ك. ازىرباەۆتىڭ «قايران جاستىق» ءانىن شىرقاپ، ءبىر سەرپىلتىپ تاستادى. كەش سوڭىندا ءوزى جازعان «ىزگىلىكپەن ورىلگەن ءومىر» كىتابىن سىيعا تارتتى.

مۋزىكا ءپانى مۇعالىمى  ب.باەكەنوۆا كەنەن اتانىڭ «باستاۋ» ءانىن، ال مەكتەپ وقۋشىسى ا.ەرەن  قۇرمانعازىنىڭ «اداي» كۇيىن تارتىپ، قوناقتارىمىزعا كەرەمەت كوڭىل سىيلادى.  № 42 ە. قاشاعانوۆ اتىنداعى ورتا مەكتەبىنىڭ  9 سىنىپ  وقۋشىلارى اقىن اعانىڭ قالامىنان تۋعان بىرقاتار ولەڭدەرىن جاتقا وقىدى. كەزدەسۋدە باسقا دا وقىرماندار تىلەكتەرىن ءبىلدىردى. جاقسىمەن بىرگە وتكىزگەن جارتى ساعات، جاماننىڭ ءوتىپ كەتكەن ومىرىندەي دەمەكشى كەزدەسۋ كەشى وقىرماندار مەن قوناقتارعا جاقسى اسەر قالدىردى دەگەن ويدامىن. قالامىڭىز ۇشتالا بەرسىن، اقىن اعا!

روزا نۇراحمەتوۆا،

№ 34 كەنەن اۋىلدىق كىتاپحاناسىنىڭ مەڭگەرۋشىسى،

كەنەن اۋىلى،

قورداي اۋدانى،

جامبىل وبلىسى