SportPress.kz قازاقستان سپورت جاڭالىقتارى
تەننيسشى زارا داركەن يتاليانىڭ سولارينو قالاسىندا ءوتىپ جاتقان ITF World Tennis Tour W15 جارىسىنىڭ ىرىكتەۋ كەزەڭىنەن سۇرىنبەي ءوتتى.
ول ءبىرىنشى اينالىمدا يتاليان دجوردجي ءپاتتيدى 6:1، 6:2 ەسەبىمەن جەڭىپ، ىرىكتەۋ كەزەڭىنىڭ فينالىندا تاعى ءبىر جەرگىلىكتى تەننيسشى كاميللا لەرۆولينودان 6:1، 6:4 ەسەبىمەن باسىم ءتۇستى.
ەندى نەگىزگى كەزەڭنىڭ العاشقى اينالىمىندا اقتوبە تەننيس مەكتەبىنىڭ تۇلەگى 25 جاستاعى ۇلىبريتانيانىڭ سپورتشىسى ابيگەيل اموسپەن كەزدەسەدى. وسىلايشا، 15 جاستاعى زارا داركەن العاش رەت جاس بولسا دا ەرەسەكتەر اراسىندا ءوتىپ جاتقان ءتۋرنيردىڭ نەگىزگى كەزەڭىنە جولداما الدى.
تاعى ءبىر ايتاتىن نارسە، قازاقستاننىڭ جۇپتىق سىنداعى ءبىرىنشى، الەمنىڭ 12-راكەتكاسى اننا دانيلينا اقش-تىڭ فورت-ۋورت قالاسىندا ءوتىپ جاتقان WTA قورىتىندى ءتۋرنيرىن ءساتتى باستادى.
ول برازيليالىق بەاتريس حادداد مايامەن بىرگە پەم شرايۆەر توبىندا العاشقى كەزدەسۋىن گابريەلا دابروۆسكي (كانادا) — دجۋليانا ولموس (مەكسيكا) جۇبىنا قارسى وتكىزدى.
ءبىرىنشى پارتيادا اننا مەن بەاتريس قارسىلاستارىنان 7:5 ەسەبىمەن باسىم ءتۇستى. قازاقستاندىق-برازيليالىق جۇپ ەكىنشى سەتتە بىردە-ءبىر گەيم بەرگەن جوق. ەسەپ — 6:0.
بۇل تۋرنيردە ءار توپتان ەكى ۇزدىك جۇپ پلەي-وفف كەزەڭىنە جولداما الادى. سونىمەن بىرگە قازاقستاندىق تەننيسشىلەر ساندۋعاش كەنجەباەۆا مەن جانەل رۇستەموۆا جۇپتىق سىندا تۇركيانىڭ انتاليا قالاسىندا ءوتىپ جاتقان ITF W15 ءتۋرنيرىنىڭ شيرەك فينالىنا شىقتى.
جۇلدە قورى 15 مىڭ اقش دوللارىنا باعالانعان جارىستىڭ العاشقى اينالىمىندا قازاقستاندىق جۇپ تۇركيالىق نەحير دوگان – بولگاريالىق ەمما فانتۋسيسپەن كەزدەستى.
كەنجەباەۆا مەن رۇستەموۆا تارتىستى باسەكەدە قارسىلاستارىن 4:6، 6:0، 10:4 ەسەبىمەن ۇتتى. قازاقستاندىق جۇپتىڭ شيرەك فينالداعى قارسىلاسى كەيىن انىقتالادى.
قازاقستاندىق تەننيسشىلەر جەكەلەي سىندا دا ءساتتى ونەر كورسەتۋدە. 17 جاستاعى ارۋجان ساعاندىقوۆا ىرىكتەۋ سايىستارىنىڭ فينالىندا شۆەتسيالىق نورا سۆەنسوندى 6:2، 7:6 (7:3) ەسەبىمەن ۇتسا، 18 جاستاعى جانەل رۇستەموۆا سلوۆەنيالىق برينا ءسۋليندى 6:3، 6:4 ەسەبىمەن جەڭدى. ەندى ولار نەگىزگى دودادا كۇش سىناسادى.
داستان كەنجالين،
استانا
