15 jastaǵy tennısshi Zara Dárken eresekter jarysyna joldama aldy

Tennısshi Zara Dárken Italııanyń Solarıno qalasynda ótip jatqan ITF World Tennis Tour W15 jarysynyń irikteý kezeńinen súrinbeı ótti.

Ol birinshi aınalymda ıtalıan Djordjı Pattıdi 6:1, 6:2 esebimen jeńip, irikteý kezeńiniń fınalynda taǵy bir jergilikti tennısshi Kamılla Lervolınodan 6:1, 6:4 esebimen basym tústi.

Endi negizgi kezeńniń alǵashqy aınalymynda Aqtóbe tennıs mektebiniń túlegi 25 jastaǵy Ulybrıtanııanyń sportshysy Abıgeıl Amospen kezdesedi. Osylaısha, 15 jastaǵy Zara Dárken alǵash ret jas bolsa da eresekter arasynda ótip jatqan týrnırdiń negizgi kezeńine joldama aldy.

Taǵy bir aıtatyn nárse, Qazaqstannyń juptyq syndaǵy birinshi, álemniń 12-raketkasy Anna Danılına AQSh-tyń Fort-Ýort qalasynda ótip jatqan WTA qorytyndy týrnırin sátti bastady.

Ol brazılııalyq Beatrıs Haddad Maııamen birge Pem Shraıver tobynda alǵashqy kezdesýin Gabrıela Dabrovskı (Kanada) — Djýlıana Olmos (Meksıka) jubyna qarsy ótkizdi.

Birinshi partııada Anna men Beatrıs qarsylastarynan 7:5 esebimen basym tústi. Qazaqstandyq-brazılııalyq jup ekinshi sette birde-bir geım bergen joq. Esep —  6:0.

Bul týrnırde ár toptan eki úzdik jup pleı-off kezeńine joldama alady. Sonymen birge Qazaqstandyq tennısshiler Sandýǵash Kenjebaeva men Janel Rústemova juptyq synda Túrkııanyń Antalııa qalasynda ótip jatqan ITF W15 týrnıriniń shırek fınalyna shyqty.
Júlde qory 15 myń AQSh dollaryna baǵalanǵan jarystyń alǵashqy aınalymynda qazaqstandyq jup túrkııalyq Nehır Dogan – bolgarııalyq Emma Fantýsıspen kezdesti.

Kenjebaeva men Rústemova tartysty básekede qarsylastaryn 4:6, 6:0, 10:4 esebimen utty. Qazaqstandyq juptyń shırek fınaldaǵy qarsylasy keıin anyqtalady.

Qazaqstandyq tennısshiler jekeleı synda da sátti óner kórsetýde. 17 jastaǵy Arýjan Saǵandyqova irikteý saıystarynyń fınalynda shveııalyq Nora Svensondy 6:2, 7:6 (7:3) esebimen utsa, 18 jastaǵy Janel Rústemova slovenııalyq Brına Sýlındi 6:3, 6:4 esebimen jeńdi. Endi olar negizgi dodada kúsh synasady.

Dastan KENJALIN,

ASTANA