قازاقستان مەن وزبەكستان فۋتبولدى بىرىگىپ دامىتۋدى قولعا الدى

تاشكەنت قالاسىندا وزبەكستان فۋتبول قاۋىمداستىعىنىڭ ءبىرىنشى ۆيتسە-پرەزيدەنتى راۆشان يرماتوۆ پەن قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ كەزدەسىپ، ورتالىق ازيادا فۋتبولدىڭ دامۋىنا ىقپال ەتەتىن ۇلكەن سينەرگيانى قۇرۋ ماقساتىندا ىنتىماقتاستىق تۋرالى مەموراندۋمعا قول قويدى.

قۇجات فەدەراتسيالار اراسىنداعى ىنتىماقتاستىقتى نىعايتۋعا، ورتالىق ازياداعى فۋتبولدى ناسيحاتتاۋعا، دامىتۋعا، بارلىق ساناتتاعى ۇلتتىق قۇرامالاردىڭ جولداستىق ماتچتارىن ۇيىمداستىرۋعا جانە مەموراندۋمعا قول قويعان ەلدەردە وتكىزىلەتىن حالىقارالىق تۋرنيرلەرگە قاتىسۋعا ارنالعان.

مەموراندۋمعا سايكەس، تاراپتار جاتتىقتىرۋشىلاردى، تورەشىلەردى جانە فۋتبول ماماندارىن وقىتۋ بويىنشا ءبىلىم بەرۋ سەمينارلارىن وتكىزىپ، سونىمەن قاتار بالالار مەن جاسوسپىرىمدەر فۋتبولىن دامىتۋعا قولداۋ كورسەتەتىن جانە سپورتتىق ءىس-شارالار باعدارلامالارىن دايىندايتىن بولادى.

وزبەكستاندا فۋتبول قارقىندى دامىپ كەلەدى. بۇگىندە وزبەكستان قۇراماسى ازياداعى ەڭ مىقتى كوماندالاردىڭ ءبىرى بولىپ سانالادى. سونىڭ ءبىر دالەلى رەتىندە وزبەكستاننىڭ الەم چەمپيوناتىنىڭ سوڭعى ىرىكتەۋ تۋرنيرىندە ءوز توبىندا 2-ورىن العانىن ايتۋعا بولادى.

داستان كەنجالين،

استانا