Rybakına Maıamı masters týrnıriniń tórtinshi aınalymyna shyqty

Qazaqstannyń birinshi, álemniń 7-raketkasy Elena Rybakına AQSh-ta ótip jatqan Maıamı WTA 1000 týrnıriniń tórtinshi aınalymyna shyqty.

Rybakına úshinshi aınalymda álemniń burynǵy ekinshi raketkasy, qazir dúnıejúzilik reıtıngte 29-orynda turǵan ıspanııalyq Paýla Badosamen kezdesti.

Ol Badosany ózi jeńimpaz atanǵan Indıan-Ýells masters jarysynda 6:3, 7:5 esebimen utqan bolatyn. Al bul joly birinshi partııada qarsylastar bastapqyda qos-qostan breık almasqan edi. Esep 3:3 bolǵan kezde Badosa taǵy bir breık jasap, alǵa shyqty. Sosyn setti taǵy bir breıkpen bitirdi. Esep – 6:3.

Ekinshi sette Paýla Badosa breıkpen alǵa shyqty. Esep – 4:2. Degenmen Elena tarazy basyn teńestire aldy. Sosyn esep 5:4 bolyp, Rybakına dop bergende, ıspanııalyq tennısshi matchbolyn paıdalana almady. Budan keıin Elena qatarynan 3 geımdi óz paıdasyna sheshti. Esep  – 7:5.

Úshinshi, sheshýshi partııada esep 3:3 bolǵan kezde Rybakına breık jasaı aldy. Aqyry matchty taǵy bir breıkpen túıindedi. Esep – 6:3.

2,5 saǵattan asa ýaqytqa sozylǵan tartysty báseke barysynda Elena Rybakına 12 eıs jasap, 15 breık-poınttyń altaýyn paıdalandy. Qarsylasy 4 eıs, 5 breıkpen (15 breık-poınt) kózge tústi.

Osylaısha, Elena qatarynan 10-jeńisine jetti.

Endi Rybakına júlde qory 8,8 mln dollarǵa baǵalanǵan Masters dodasynyń shırek fınalyna shyǵý úshin álemniń 39-raketkasy, belgııalyq Elıza Mertens nemese reıtıngte 41-satydaǵy horvatııalyq Petra Martıchtiń bireýimen talasady.

Erkeǵalı BEISENOV,

ASTANA