استانادا حالىق باتىرىنا قۇرمەت كورسەتىلەدى

بيىل ۇلت-ازاتتىق كوتەرىلىسىنىڭ باس ساردارى، حالىق باتىرى امانگەلدى يمانوۆتىڭ تۋعانىنا 150 جىل. وسىعان وراي  استانا قالاسى اكىمدىگىنىڭ ە.راحماديەۆ اتىنداعى مەملەكەتتىك اكادەميالىق فيلارمونياسى 3 ءساۋىردە ساعات 18.00-دە  «دالا داۋىلپازى» اتتى اكادەميالىق كونتسەرت ۇسىنادى.

كونتسەرتتە سيمفونيالىق وركەستر مەن ەتنو-فولكلورلىق انسامبل بىرلەسىپ، العاش رەت سينتەزدەلگەن فورمادا ونەر كورسەتەدى. بۇل — قازاقستاندا العاش رەت جاسالىپ وتىرعان ەكسپەريمەنتتى كونتسەرت.

حالىق باتىرى امانگەلدى يمانوۆقا تانىمال كومپوزيتورلار مۋزىكا ارنادى. وپەرالار، سيمفونيالار جازىلدى. كلاسسيك كومپوزيتورلار م.تولەباەۆ پەن ە.برۋسيلوۆسكيدىڭ «امانگەلدى» وپەراسى، قىتاي كومپوزيتورى سي سينحايدىڭ «امانگەلدى» سيمفونياسى سونىڭ ايعاعى.  سونداي-اق، ءابلاحات ەسباەۆ، لاتيف حاميدي، بوريس ەرزاكوۆيچ، دميتري ماتسۋتسين، اتاقتى كۇيشى سۇگىر سىندى كومپوزيتورلاردىڭ شىعارمالارى قازاق راديوسىنىڭ «التىن قورىندا» ساقتاۋلى. ال اريالاردى قازاق وپەرا ونەرىنىڭ نەگىزىن قالاۋشىلار ماناربەك ەرجانوۆ، مۋسليم، ريشاد ابدۋلليندەر، ەرمەك سەركەباەۆ، سۋات ابۋسەيتوۆ، راشيت مۇساباەۆ، كاۋكەن كەنجەتاەۆ مەن باسقا دا ونەرپازدار ورىنداعان. وسى اتالعان شىعارمالار قايتا وڭدەلىپ، كونتسەرتتە جاڭا داۋىستا اۋەلەيتىن بولادى. سونداي-اق، ەلىمىزگە تانىمال كومپوزيتورلار مارات بەردىعۇلوۆ، سەرىك ءابدينۇروۆ، ايتباي مۇزداحانوۆ، شولپان قورعانبەك، ايسۇلۋ تاني، ەرتاي باكيروۆتىڭ دە شىعارمالارىن تىڭدايسىزدار.

قاي زاماندا بولماسىن، ازاماتتىڭ رۋحىن كوتەرەتىن، جىگەرلەندىرەتىن جورىق جىرلارى، اسكەري-پاتريوتتىق اندەر وسكەلەڭ ۇرپاققا اۋاداي قاجەت. وسى تۇستا ايتىپ وتەيىن، قازاق مۋزىكا ونەرىندە امانگەلدى باتىرعا ارنالعانداي كوپ شىعارما جازىلماعان شىعار. ءالى دە جازىلىپ كەلەدى. ءبىز فيلارمونيا مۋزىكانتتارى ۇزاق جىلدار بويى مۇراعاتتا جاتىپ قالعان نوتالىق جانە اۋديو جازبالاردى قالپىنا كەلتىرۋ بويىنشا ۇلكەن جۇمىس جۇرگىزدىك. بۇل قيىندىعى مول، تاباندىلىقتى، شىدامدىلىق پەن ۇقىپتىلىقتى قاجەت ەتەتىن ۇلكەن ءىس. جۇمىس نوتالىق رەداكتسيا، جاڭا ارانجيروۆكا، جاڭا اسپاپتىق وڭدەۋ، سيمفونيالىق وركەستر مەن فولكلورلىق ءانسامبلدىڭ جاڭا دىبىستىق سينتەزىنىڭ ۇندەسۋى باعىتىندا جۇرگىزىلدى. ءبىزدىڭ مىندەتىمىز – بۇل كلاسسيك كومپوزيتورلارىمىزدىڭ جانە جاس كومپوزيتورلاردىڭ  امانگەلدى يمانوۆتىڭ كوركەمدىك بەينەسىن اشۋعا ارنالعان شىعارمالارىن ەلىمىزدە عانا ەمەس، شەتەلدەردە دە ناسيحاتتاۋ. مەن دە بۇل كونتسەركە ەرلىك پەن ورلىكتى، ۇلتىنا دا سۇيسپەنشىلىكتى باياندايتىن شىعارما جازىپ، سول ەڭبەگىمدى امانگەلدى يمانوۆ اتامىزدىڭ رۋحىنا ارناپ وتىرمىن، -دەدى «قورقىت» ەتنو ءانسامبلىنىڭ كوركەمدىك جەتەكشىسى، قر مادەنيەت قايراتكەرى شولپان قورعانبەك».

كونتسەرتكە استانا قالاسى اكىمدىگىنىڭ ە.راحماديەۆ اتىنداعى مەملەكەتتىك اكادەميالىق فيلارمونياسىنىڭ سيمفونيالىق وركەسترى، «قورقىت» ەتنو ءانسامبلى، ۇرلەمەلى وركەستر، «ناز» مەملەكەتتىك بي تەاترى، جەكە ورىنداۋشىلار: قازاقستاننىڭ ەڭبەك سىڭىرگەن قايراتكەرى، كۇيشى انار مۇزداحانوۆا، «دارىن» مەملەكەتتىك جاستار سىيلىعىنىڭ يەگەرى التىنبەك ءابىلدا، حالىقارالىق بايقاۋلاردىڭ لاۋرەاتتارى: تالعات اللابيرينوۆ، التىنبەك ارىستانبەك، ءنۇرسات الماس، جاندوس يمانباي، ايدوس وڭعارباي، نۇرجان مەيىرحان قاتىسادى.

استانا قالاسى اكىمدىگىنىڭ ە.راحماديەۆ اتىنداعى مەملەكەتتىك اكادەميالىق فيلارمونياسىنىڭ ءباسپاسوز قىزمەتى