رىباكينا «رولان گارروس» ءتۋرنيرىن جەڭىسپەن باستادى

قازاقستاننىڭ ءبىرىنشى، الەمنىڭ ءتورتىنشى راكەتكاسى ەلەنا رىباكينا فرانتسيانىڭ اشىق چەمپيوناتى — «رولان گارروس» ءتۋرنيرىنىڭ ەكىنشى اينالىمىنا شىقتى.

رىباكينا العاشقى اينالىمدا دۇنيەجۇزىلىك رەيتينگتە 146-ورىندا تۇرعان چەحيالىق 16 جاستاعى برەندا فرۋحۆيرتوۆامەن كەزدەسىپ، ونى 6:4، 6:2 ەسەبىمەن ۇتتى.

ءبىرىنشى پارتيادا ەسەپ 3:3 بولعان كەزدە چەحيالىق سپورتشى برەيكپەن العا شىققان ەدى. بىراق رىباكينا ونىڭ جەڭىسكە دەگەن جىگەرىن كوپ ۇزاتپادى.  قازاقستاندىق تەننيسشى تاعى ءبىر برەيكپەن سەتتى  6:4 ەسەبىمەن اياقتادى.

برەندا فرۋحۆيرتوۆا ەكىنشى پارتيادا دا برەيك جاساعانىمەن رىباكينا تارازى باسىن قايتا تەڭەستىرىپ، ءوز گەيمىن دە الدى. ەسەپ -3:2. سودان كەيىن ول ماتچتى كەزەكتى برەيكپەن تۇيىندەدى. وسىلايشا ول ەكىنشى سەتتە قارسىلاسىن  6:2 ەسەبىمەن جەڭدى.

بۇل ماتچ ءبىر ساعات 17 مينۋتقا سوزىلدى. كەزدەسۋدە ەلەنا رىباكينا 9 ەيس جاساپ، 8 برەيك-پوينتتىڭ بەسەۋىن ءمۇلت جىبەرگەن جوق. ەندى ول ەكىنشى اينالىمدا چەحيانىڭ تاعى ءبىر جاس تەننيسشىسى، بولاشاعىنان زور ءۇمىت كۇتتىرىپ جۇرگەن سپورتشىسى الەمنىڭ 50-راكەتكاسى، 18 جاستاعى ليندا نوسكوۆامەن كورتقا شىعادى.

ال الەكساندر بۋبليك 3 ساعات 20 مينۋتقا سوزىلعان تارتىستى ويىندا رەيتينگتە 129 ورىندا تۇرعان يتالياندىق دجۋليو زەپپيەريگە — 0:6، 6:4، 6:4، 3:6، 5:7 ەسەبىمەن ۇتىلدى.

داستان كەنجالين،

استانا