Semeıde Halyq qaharmanyna qurmet kórsetildi

Jyl saıyn Táýelsizdik merekesinde Semeıdiń sport akademııasynyń uıymdastyrýymen elimizdiń endi býyny bekip kele jatqan jas balýandarynyń basyn qosatyn jarys ótedi.

Olaı deıtinimiz, Semeı sport akademııasynda dzıýdo kúresinen Halyq qaharmany Qaırat Rysqulbekov atyndaǵy týrnır ótkizý dástúri qalyptasqan. Bıyl da bilgennen jańylmaı, mereke kúni Semeı tórine kilem tóseldi. Muzda janǵan alaý Qaırattyń qurmetine arnalǵan respýblıkalyq ashyq týrnırde on segiz ben jıyrma jastaǵy qyz – jigitter jan alysyp, jan beristi. Aıtpaqshy, bul jarys tuńǵysh ret respýblıkalyq deńgeıde uıymdastyrylyp, bási joǵary baıraqty básekelerdiń qataryna qosylǵanyn aıta ketý lázim. Sondyqtan bıylǵy jarys burynǵy jarystardan ózgerek. Astana men Almaty qalalarynan, Almaty, Qaraǵandy, Qyzylorda, Pavlodar jáne Shyǵys Qazaqstan oblystarynyń komandalarynan jınalǵan 160-qa tarta uldar men qyzdar 9 salmaqta synǵa tústi.

— Árbir eldiń jylnamasynda onyń jańa tarıhynyń bastaýy bolǵan taǵdyrsheshti tańdary bolady ǵoı. Biz úshin jańa dáýirdiń araıly tańy 1991 jyldyń 16 jeltoqsanynda atty. Mine, bıyl rýhy asqaq, tuǵyry bıik elimizdiń Táýelsizdigin jarııalaǵanyna 27 jyl toldy. Biz babalarymyzdyń júrekpen qalaǵan Táýelsizdigin kózben kórdik. Uly dalanyń ulyq merekesinde Semeı sport akademııasynyń uıymdastyrýymen dzıýdo kúresinen 1998 – 2000 jyly týǵan jasóspirimder arasynda Halyq qaharmany Qaırat Rysqulbekov atyndaǵy respýblıkalyq ashyq týrnırdi ótkizýdi dástúrge aınaldyrǵan edik. Búgingi jas urpaq Qaırattyń, Lázzattyń, Erboldyń erlikterin umytpaýy tıis. Biz eldiktiń, egemendiktiń jolynda janyn qurban etken batyrlardy eske ala otyryp, búgingi býynǵa patrıottyq tárbıe bere alamyz, – deıdi jarystyń ótýine negizgi bastamashy bolǵan azamat Qazaqstan Respýblıkasyna eńbek sińirgen jattyqtyrýshy, Semeı sport akademııasynyń dırektory Mereıǵaly Kóshkinov.

Álbette, jarys bolǵan soń baq pen baptyń qatar shapqany kerek. Balǵyn balýandardyń aıaq alysy, boz kilemdegi qımyly, aıla – tásilge ushqyrlyǵy qandaı, beldesýlerge bapkerlerdiń kóńili tola ma, jańa esimder estı alamyz ba degen maqsatpen Semeı sport akademııasynyń dzıýdo bóliminiń joǵary dárejedegi aǵa jattyqtyrýshysy Erjan Jantasovpen pikirlestik.

– Qaırat Rysqulbekov atyndaǵy ashyq týrnırdi Qazaqstan Respýblıkasy dzıýdo federaııasynyń kúntizbelik josparyna engen el kólemindegi jyldy qorytyndylaıtyn sońǵy jarystardyń biri dep aıtýǵa bolady. Boıynda namysy bar balýan boz kilemge jeńemin dep shyǵady ǵoı. Jarys jolyna shyqqandardyń daıarlyǵy, daıyndyǵy jaqsy eken. Kóbiniń esimderi eldiń aýyzyna ilige bastaǵandar. Jattyqtyrýshy retinde aıtarym, mundaı jarystar tájirıbe jınaýǵa úlken múmkindik beredi. Dzıýdo shapshańdyqty talap etetin kúrestiń túri. Eldostyń, Jansaıdyń, Ǵumar men Ǵusmannyń, Erasyldyń izbasarlary osy jerde beldesip jatqanyna bek senimdimin, – deıdi Erjan Jantasov bapker.

Sonymen baǵy janǵandar, baby keliskender top jardy. Erlan Ońalov, Nurjan Ábet, Raýan Begaly, Qýan Barys, Erzat Arǵynov, Temirjan Qulbaev, Izbasar Eralıev, Daryn Beıishanovtar óz salmaǵynda jeńimpaz atandy. Qyzdar arasynda Aısulý Orynǵazyqyzy, Jansaıa Ahmetbekova, Rysaldy Aqshaıyqova, Zarına Sarıpova, Nurjaz Sabıolla jeńistiń bıik tuǵyryna kóterildi.

Semeı sport akademııasynyń baspasóz qyzmeti     

Shyǵys Qazaqstan oblysy,

 Semeı qalasy