SportPress.kz Qazaqstan sport jańalyqtary
Shyǵys Qazaqstan oblysynyń ákimi Danıal Ahmetov Semeı sport akademııasynda boldy.
Akademııa dırektory Mereıǵaly Kóshkinov oblys ákimine atqarylyp jatqan jumystar men oqýshylardyń jetistikteri týraly jan-jaqty aıtyp berdi. Esterińizde bolsa, osydan eki jyl buryn sport akademııasy janynan Danıal Ahmetovtiń bastamasymen sportqa beıimi men beıili bar balalarǵa arnalyp 200 orynǵa arnalǵan jataqhana ashylǵan bolatyn. Qazir munda kúrestiń birneshe túrimen shuǵyldanatyn, voleıbolmen aınalysatyn jósóspirim ul-qyzdar turyp jatyr.
Jalpy, Shyǵys Qazaqstanda qazir voleıboldyń damýy ózge óńirlerge qaraǵanda kósh ilgeri. Oblystyń «Altaı» qyzdar qurama komandasy halyqaralyq dárejede jaqsy oıyn órnegimen erekshelenýde. Osy rette «Altaıdyń» kásibı deńgeıin arttyryp, qarqynyn joǵaltpaý maqsatynda birneshe qosalqy komandalar da qurylǵan. Olardy qosalqy dep qomsynýǵa bolmaıdy. О́ıtkeni, el ishilik jarystarda nátıjeler kórsetýde. Semeı sport akademııasyndaǵy «Altaı – 4» komandasyndaǵy 14 pen 17 jas aralyǵyndaǵy tálim alyp jatqan 30 qyz da erteń komandanyń negizgi oıynshysyna aınalýy múmkin.
Danıal Ahmetov aldymen voleıbolshy qyzdardyń jattyǵýyn den qoıa tamashalady. Japonıadan kelgen Sae Ishıda esimdi jattyqtyrýshy akademııada oqyp jatqan voleıbolshy qyzdarǵa bilgenin úıretýde. Qımyldary shıraq, qozǵalystary shapshań, ózara árekettese qyzý jattyǵýdaǵy qyzdarǵa oblys ákimi «daıyn komanda» dep baǵasyn berdi, Japon qyzyna alǵysyn bildirip, jumysyna sáttilik tiledi.
–Kelesi jyly sizder «Altaı — 3» kásibı komandasynyń oıynshysyna aınalasyzdar. Ol úshin tynbaı jattyǵý jasaýlaryńyz qajet. Sizderdiń bilikti jattyqtyrýshylaryńyz bar. 2020 jyly ótetin Tokıodaǵy Olımpıada oıyndarynda «Altaı» komandasy ulttyq quramanyń qalqany bolatynyna senimdimin, – degen Danıal Ahmetov jas voleıbolshy qyzdarǵa sportta jetistikke jetýde myqty jattyqtyrýshy men sportshynyń eńbekqorlyǵy asa mańyzdy ekenin atap ótti.
–Biz Japonııa, Serbııa elderinen myqty jattyqtyrýshylardy shaqyrdyq. Shetelden shaqyrtqan bapkerdiń aıyrmashylyǵy nede degen suraq týyndaýy múmkin. Olar jattyǵýdy kúnine úsh saǵattan eki ýaqyt ótkizedi. Mundaı jattyǵý jasaý júıesi oblys, tipti, elimizde joq. Mine, jetistikke jetýdiń joly osynda jatyr. Bıikti baǵyndyrǵymyz keledi eken, onda sportqa balalardyń emes, jattyqtyrýshylardyń kózqarasyn ózgertýimiz kerek, – dep atap ótti oblys ákimi.
Semeı sport akademııasynyń baspasóz qyzmeti
Shyǵys Qazaqstan oblysy,
Semeı qalasy
