قازاق جاستارى جارىستان جەتى جۇلدە اكەلە جاتىر

10-12 مامىر ارالىعىندا ۋكراينانىڭ ودەسسا قالاسىندا  مەيبۋاكان گودزيۋ-ريۋ كاراتە-دو جەكپە-جەگىنەن وتكەن الەم چەمپيوناتىندا قازاقستان قۇراماسى 4 التىن، 1 كۇمىس، 2 قولا مەدال الىپ، كوماندالىق ەسەپتە ەكىنشى ورىنعا يە بولدى.

وسى دودادا ەل نامىسىن قورعاعان قايسار مىنەز قاراكوز جاستارىمىزدىڭ بارلىعى دەرلىك قۇر قول قايتپاي، جەڭىس ساتىسىنا كوتەرىلىپ، ۇلكەن جەتىستىكپەن ەلگە ورالىپ كەلەدى.

الەم چەمپيوناتى بولعان سوڭ  ءار ەلدىڭ سايدىڭ ىرىكتەلىنىپ الىنعان مارقاسقا سپورتشىلارى كەلەتىنى بەلگىلى. ودەسسا قالاسىندا گودزيۋ-ريۋ كاراتە-دو جەكپە-جەگىنەن جالاۋىن كوتەرگەن دۇرمەكتى دودادا  18  مەملەكەتتىڭ ايتۋلى سپورتتىڭ شەبەرلەرى ونەر كورسەتتى. وسى سىنعا قازاقستان كومانداسىن باستاپ بارعان ۇلتتىق قۇرامانىڭ باس جاتتىقتىرۋشىسى نۇرلان كەرىمباەۆتىڭ شاكىرتتەرى ۇلكەن جەتىستىكپەن ورالىپ كەلەدى.

سونىمەن ەل قورجىنىنا جۇلدە سالعان كاراتە شبەرلەرىنىڭ ەسىمدەرىن العا تارتالىق. نەگىزى جەكپە-جەكتەر گو كۋميتە – تولىقتاي كونتاكت پەن  دزيۋ كۋميتە – جارتىلاي كونتاكت سەكىلدى  ەكى جۇيەمەن وتكەن ەكەن.  التىن جۇلدەنى 57، 63، 84 جانە ابسوليۋتتىك سالماقتاردا باۋىرجان جۇمان، نەسىپبەك باقتيار، جانداۋلەت بەكزاتوۆتار جەڭىپ السا، كۇمىس جۇلدەنى 57 كيلودا مەدەت باعدات، قولا  جۇلدەنى 74 كگ سالماقتا ماۋلەن تۇرىسبەكتەر يەلەندى.

ءبىر ايتا كەتەر قۋانىشتى ءجاي، ابسوليۋتتىك سالماقتا ونەر كورسەتكەن  جەرلەسىمىز جانداۋلەت بەكزاتوۆ الەمنىڭ 3 دۇركىن، ەۋروپانىڭ 2 دۇركىن جانە ۋكراينانىڭ  5 دۇركىن چەمپيونى  گۋنكونى اسقان باسىمدىلىقپەن اتويلاپ ءجۇرىپ جەڭگەن ەكەن. جالپى 500-دەن اسا كاراتە-دو شەبەرلەرى قاتىسقان الەم چەمپيوناتىندا توپجارىپ وسىنداي تابىسقا يە بولۋ ۇلكەن ماقتاۋعا لايىقتى ناتيجە. قازاقستان قۇراماسىنىڭ سپورتشىلارى وسىنداي تولاعاي تابىسىمەن كوزسىز ەرلىك جاساپ، ەلىمىزدىڭ  مەرەيىن اسقاتاتىپ وتىر. جەڭىستىڭ باس تۇعىرىنا كوتەرىلگەن سپورتشىلارىمىز 4 رەت ەلىمىزدىڭ ءانۇرانىن ورىنداتىپ، كوك بايراعىمىزدى 4 رەت بارىنەن بيىك كوككە كوتەرۋگە ءماجبۇر ەتتى.

ءيا، گودزيۋ-ريۋ كاراتە-دو سپورتى ەلىمىزدە ەندى عانا ەڭسەسىن تىك ۇستاپ، الەم الاماندارىنا قوسىلىپ كەلە جاتقان جاس سپورت ءتۇرىنىڭ ءبىرى. دەگەنمەندە مەيبۋكان گودزيۋ-ريۋ كاراتە-دو اسسوتسياتسياسىنىڭ پرەزيدەنتى، قارا بەلبەۋ 6 دان يەگەرى نۇرلان كەرىمبەكوۆ سەكىلدى ءوز ءىسىنىڭ مايتالمان شەبەر ماماندارى جاتتىقتىراتىن ەل قۇراماسىنىڭ جاستارى جالىندى ونەرلەرىمەن سوڭعى جىلدارى كوماندالىق ۇزدىك ۇشتىكتەن تومەن تۇسكەن ەمەس.

«ەلىم دەيتىن ەر بولماسا، ەرىم دەيتىن ەل قايدان  بولسىن»، – دەگەندەي، ەلىم دەپ، ەلەۋلى ەڭبەگىمەن العىسقا بولەنە باستاعان نۇرلان كەرىمبەكوۆتەي ەر تۇلعالى، ءوز تاڭداعان سپورتىنا جاناشىر جانداردىڭ ارقاسىندا  كەنجەلەپ بولسا  دا كەلىپ قوسىلعان، گودزيۋ-ريۋ مەيبۋاكان كاراتە-دو ءتۇرى، قازىردىڭ وزىندە ايتارلىقتاي تابىستارعا قول جەتكىزە باستادى. سونىڭ ءبىر ايشىقتى ايعاعى ودەسسادا وتكەن الەم چەمپيوناتىنداعى قازاقستان قۇراماسىنىڭ وراسان زور تابىسى ەكەنىن ايتقىمىز كەلەدى. «قارعا سويسا دا قاساپشى سويسىن»، – دەمەكشى، نۇرلاننىڭ شىعىستىڭ وسى ءبىر سپورتىن ءتۇرىنىڭ  ءادىس-ايلاسىن  تەرەڭ مەڭگەرىپ العانىمەن قوسا، ايتۋلى سپورت ءتۇرىن جاقسى كورىپ، شاكىرتتەرىنە باي تاجىربيەسىن ايانباي بەرە وتىرىپ، جەڭىس جولىندا بارىنشا ارەكەت جاساۋىنىڭ جەمىسى وسىنداي ۇلكەن ناتيجەلەرگە جەتكىزسە، ايبارلى دا ايبىندا  الاشتىڭ جاس ۇلاندارى جەڭىس تۇعىرىنىڭ بارلىق ساتىسىنان كورىنىپ، ەلىمىزدىڭ ابىرويىن اسقاتاتىپ قايتىپ كەلەدى.  ەندەشە جىگەرلى جاستارىمىزدى  جەڭىستەرىمەن قۇتتىقتاپ، الداعى ۋاقىتقا ساتتىلىك تىلەيمىز.

اقىن ورداباي ۇلى،

الماتى