• Қазақ
  •   
  • Qazaq
  •   
  • قازاق
  •   
  • Рус
  •   

    Eralhan Aıkóz — at ústinen sadaq atýdan tuńǵysh álem chempıony

    Búgin «Nur-Sultan Ethno Fest»  merekesi aıasynda ótken «Altyn jebe» I álem chempıonaty aıaqtaldy.  Bul dodada qazaq surmergeni Eralhan Aıkóz tuńǵysh álem chempıony atandy.

    Túske deıin «Túrik stıli» boıynsha ótken báseke tamashalandy. Bul mergendik saıysynda dúnıejúzilik jarystardyń ataqty mergeni, rýmynııalyq Mıhaı Kozmeı chempıon atanǵan-dy. Ekinshi oryndy keshegi «Azııalyq stılde» de júldeli oryn alǵan koreıalyq jas mergen Lı Sýng Ho ıelendi. Al, úshinshi orynǵa Eralhan Aıkóz taban tiredi.

    Sýrette: I álem chempıonatynyń júldegerleri.  Ortada at ústinen sadaq atýdan álem chempıony – Eralhan Aıkóz (Qazaqstan). Oń jaqta  ekinshi  oryn ıelengen  Erdenesývd Erdene (Monǵolııa) jáne sol jaq shette úshinshi oryn ıegeri  Lı Sýng Ho (Ońtústik Koreıa).

    Sýrette: «Túrik stıli» boıynsha ótken básekede jeńimpaz bolǵan rýmynııalyq Mıhaı Kozmeı

    Al, «Qazaq stıli» boıynsha jamby atý jarysynda túriktiń mergeni Aıaz Iavýz chempıon atandy. Bul básekede Abzal Týlybekov ekinshi oryndy, úshinshi orndy monǵolııalyq mergen Erdenesývd Erdene ıelendi.

    Sýrette:  «Qazaq stıli» jarysynyń jeńimpazy túrik mergeni Aıaz Iavýz

    At ústinen sadaq atýdan tuńǵysh álem chempıony osy jarystyń qorytyndysy boıynsha anyqtaldy. Bes sportshy I álem chempıonatynyń júldesin ıelendi.

    «Altyn jebe» I álem chempıonatynyń jeńimpazdary men júldegerleri:

    1 oryn – Eralhan Aıkóz (Qazaqstan)

    2 oryn – Erdenesývd Erdene (Monǵolııa)

    3 oryn – Lı Sýng Ho (Ońtústik Koreıa)

    4 oryn – Abzal Týlybekov (Qazaqstan)

    5 oryn – Mıhaı Kozmeı (Rýmynııa)

    Eske salyp ótelik, I álem chempıonatyna qatysqan Qazaqstan qurama komandasyndaǵy sportshylary: Aıtbek Sarybaı, Eralhan Aıkóz, Abzal Týlybekov, Eldos Badashev, Baqdáýlet Babajan, Ǵalymjan О́mirtaı.

    Sýrette: Oń jaqtan ekinshi turǵan I álem chempıonatynyń chempıony Eralhan Aıkóz, oń jaqtan birinshi turǵan álem chempıonatynyń júldegeri Abzal Týlybekov.

    «Altyn jebe» I álem chempıonatyna qatysqan shetel mergenderi: Alperen Alkan – Túrkııa, Iavýz Aıaz – Túrkııa, Ýalıd Haýajkı – Sırııa, Alı Gýrmanı – Iran, Trýkanov Dımıtar – Bolgarııa, Hodleı Halson – AQSh, Frank Sıhler – AQSh, Park Beom Nam – Ońtústik Koreıa, Lı Sýng Ho – Ońtústik Koreıa, Erdenesývd Erdene – Monǵolııa, Gantýmýr Idenbaatar – Mońǵolııa, Ýladaev Hongr – Reseı, Lıýbov Moroko– Reseı, Vıtalıı Gýdyn – Ýkraına, Vladımır Ianchenko – Ýkraına, Mıhaı Kozmeı – Rýmynııa, Almazbek Akýnov – Qyrǵyzstan, Aıana Qadyrbekova – Qyrǵyzstan. Chempıonattyń bas tóreshisi, mońǵolııalyq bapker Rom Áýeshan.

    Sýrette; «Altyn jebe» I álem chempıonatynyń kúmis júldesin ıelengen Erdenesývd Erdene (sol jaqtan birinshi) jáne chempıonattyń bas tóreshisi Rom Áýeshan (ortada). 

    Sýrette: «Altyn jebe» I álem chempıonatynyń qola júldegeri Lı Sýng Ho (Ońtústik Koreıa).

     «Altyn jebe» ataýy álem mergenderine halyqaralyq týrnır retinde jaqsy tanys.   Sebebi, 2017 jyly jáne 2018 jyly elorda tórinde «Altyn jebe» jarysy  halyqaralyq týrnır deńgeıinde uıymdastyryldy. Alǵashqy jylǵy básekede 11 memlekettiń 19 mergeni, al,  2018 jylǵy «Altyn jebede» 11 memlekettiń 25 mergeni baq synady. Qos týrnırdiń de bas júldesin rýmynııalyq surmergen Mıhaı Kozmeı jeńip aldy. Birinshi týrnırdiń kúmis júldesin Aıtbek Sarybaı, qola júldesin Eralhan Aıkóz ıelengen-di. Ekinshi týrnırdiń kúmis júldesine  Eralhan Aıkóz, qola júldesine Abzal Týlybekov qol jetkizgen bolatyn.

    Budan buryn «Altyn jebe» mergender týrnırinde eki ret júldeger atanǵan Eralhan mergen endi mine, tuńǵysh ótken «Altyn jebe» álem chempıonatynyń chempıony atandy. Eralhan Aınarbekuly — Túrkistan óńiriniń týmasy. Onyń jeńisi – siz ben bizdiń ortaq qýanyshymyz! Jeńis qutty bolsyn, aǵaıyn!

    Tólegen JÁKITAI

     

    Pikir jazý

    Your email address will not be published. Required fields are marked *

    *