SportPress.kz Qazaqstan sport jańalyqtary
Mádenıet jáne sport mınıstri Aqtoty Raıymqulova bokstan Sıdneı Olımpıadasynyń chempıony Bekzat Sattarhanovtyń ákesi Seıilhan Sattarhanulymen, anasy Syrlykúl Sattarhanovamen jáne Bekzattyń rólin somdaǵan «Astana Musical» memlekettik teatrynyń akteri Samat Ázimqulovpen kezdesti, dep habarlady Mádenıet jáne sport mınıstrligi Sport jáne deneshynyqtyrý isteri komıtetiniń baspasóz qyzmeti.
Vedomstvo basshysy XXVII Olımpıadada jartylaı jeńil salmaqta chempıon ataǵyn jeńip alyp, qazaqtyń mereıin asqaqtatqan bylǵary qolǵap sheberi Bekzattaı uldy tárbıelegen ata-anasyna qurmet kórsetip, alǵys hatty tabys etti.
–Mádenıet jáne sport mınıstrliginiń jáne óz atymnan Sizderge qazaq eliniń birtýar uly, halqymyzdyń maqtanyshy, sport áleminde aty altyn árippen jazylǵan Bekzattaı uldy tárbıelep, ósirgenderińiz úshin alǵysymdy bildiremin. Bekzattyń jarqyn beınesi óskeleń urpaq úshin úlken tárbıelik mánge ıe dep bilemin, – dedi mınıstr.
Olımpıada chempıonynyń ákesi Seıilhan Sattarhanov Japonııanyń astanasy Tokıoda 2020 jyly ótetin Olımpıada oıyndarynda bokstan Qazaqstan quramasyna sáttilik tilep, jyly lebiz bildirdi. Anasy Syrlykúl Sattarhanova bas júldemen oralǵan ulynyń «Bul tek meniń ǵana jeńisim emes. Bul – búkil elimniń jeńisi. Men áli úsh dúrkin Olımpıada chempıony bolamyn, – dep aıtqandyǵyn eske aldy. Sondaı-aq, Bekzattyń ata-anasy Túrkistan qalasyndaǵy mektepke jáne Nur-Sultan qalasyndaǵy kóshege Bekzattyń esimin berý jóninde usynys bildirdi. О́z kezeginde mınıstr Aqtoty Raıymqulova osy baǵytta tıisti jumystardy pysyqtaýǵa tapsyrma berdi.
Bekzat Sattarhanov bokspen 15 jasynan shuǵyldana bastady. Soǵan qaramastan 20 jasynda Olımpıada chempıony atandy. 1998 jyly jastar arasynda Azııa chempıonatynyń kúmis júldegeri, 1998 jyly jastar arasynda álem chempıonatynyń kúmis medalısi, 1999 jyly Azııa chempıonatynyń kúmis júldegeri, 1999 jyly Orta-Azııalyq memleketteriniń jeńimpazy boldy. О́kinishke oraı 2000 jyly 31 jeltoqsanda Jańa jyl qarsańynda Ordabasy aýdanynda jol apatynan qaza tapty.
Qazirgi ýaqytta B.Sattarhanov atymen Shymkent qalasynda daryndy balalarǵa arnalǵan sporttyq mektep-ınternat, Kentaý qalasynda keshendi balalar-jasóspirimder sport-mektebi atalady. Túrkistan qalasyndaǵy dańǵyldardyń birine Bekzattyń esimi berilgen. 2007 jyldan bastap jyl saıyn bokstan Bekzat Sattarhanov atyndaǵy jastar arasyndaǵy halyqaralyq týrnır ótedi.
3 shilde kúni elordada Olımpıada chempıony týraly Murat Bıdosov túsirgen «Bekzat» atty kórkem fılmniń jabyq kórsetilimi boldy. Kınolenta «Habar» Agenttiginiń tapsyrysy boıynsha túsirildi. Fılmde sportshynyń ómiri, karerasynyń bastalǵan kezi baıandalǵan.
