SportPress.kz Qazaqstan sport jańalyqtary
«Altyn tulparda» – 2014 jyly 75 júırik, 2015 jyly 96 júırik, 2016 jyly 78 júırik, 2017 jyly 37 júırik baq synady.
«Altyn tulpar» alaman báıgesiniń Qazaqstannyń eń úzdik sáıgúlikteri qatysatyn, aıtýly atbegilerdiń asyǵa kútetin qyzyqty merekesine aınala bastaǵanyna birneshe jyl. Naqty aıtqanda, bul at jarysy eń alǵash 2014 jyly «Nur-Otan» partııasynyń qoldaýymen, partııanyń 15 jyldyq mereıtoıyna oraı uıymdastyrylǵan bolatyn. Sondaı-aq, «Altyn tulpar» báıgesi 2015 jyly «Qazaq handyǵynyń 550 jyldyǵyna» oraı, 2016 jyly Qazaqstan Respýbıkasy Táýelsizdiginiń 25 jyldyǵy qurmetine, al, 2017 jyly «EKSPO-2017» halyqaralyq kórmesi aıasynda ótti. Barlyq jarys Nur-Sultan qalasy aýmaǵynda tamashalandy.
«Altyn tulpar» báıgesin uıymdastyrýdaǵy basty maqsat – qazaqy qoltýma júırik jylqylar tuqymynyń qalyptasýyna yqpal jasaý jáne uzaqqa shabatyn báıge attaryn baptaıtyn atbegilerdi yntalandyrý edi. Az ýaqytta jurshylyq kóńilinen shyqqan bul at jarysynyń keń qanat jaıýyna «Nur Otan» partııasy tóraǵasynyń birinshi orynbasary Baýyrjan Baıbektiń, Ulttyq sport qaýymdastyǵynyń Qurmetti prezıdenti Qaırat Satybaldyulynyń, Qaýymdastyq prezıdenti Bekbolat Tileýhannyń sińirgen eńbegi zor ekenin atsúıer qaýym jaqsy biledi.
Eń alǵashqy «Altyn tulpar» báıgesiniń qashyqtyǵy 43 shaqyrym bolǵany jankúıerler esinde. «Júırikten júırik ozar jarysqanda» degendeı, 2014 jylǵy alamanda Qaraǵandy oblysynyń júırigi «Baqtory» aldyna qara salmaı dara keldi. Elimizdiń atbegileri sol joly báıge qashyqtyǵynyń 43 shaqyrymnan da kóbirek bolýyn ótingen-di.
2014 jyl. 43 shaqyrym.
Bas báıge – «Baqtory», Qaraǵandy óńiriniń júırigi
2 oryn – «Rabat», Túrkistan óńiriniń júırigi
3 oryn – «Bektory», Qaraǵandy óńiriniń júırigi
2015 jyly «Altyn tulpardyń» báıge joly 51 shaqyrymǵa uzartyldy. Jańa qashyqtyqta Jambyl oblysynyń tulpary «Camaldan» ozǵan qylquıryqty bolǵan joq.
2015 jyl. 51 shaqyrym.
Bas báıge – «Samal», Jambyl óńiriniń júırigi
2 oryn – «Beıbarys», Kereký óńiriniń júırigi
3 oryn – «Jannur» Almaty óńiriniń júırigi
4 oryn «Baqtory», Qaraǵandy óńiriniń júırigi
2016 jylǵy báıgede Jetisý ólkesiniń júırigi «Jannur» máreden jarqyrap jalǵyz ótti.
2016 jyl. 51 shaqyrym.
Bas báıge – «Jannur», Almaty óńiriniń júırigi
2 oryn – «Kókbastaý», Qaraǵandy óńiriniń júırigi
3 oryn – «Kógershin», Jambyl óńiriniń júırigi
2017 jyly «Samal» sáıgúlik «Altyn tulpardyń» on mıllıon teńgelik bas báıgesin ekinshi márte qanjyǵasyna baılady.
2017 jyl. 51 shaqyrym.
Bas báıge «Samal», Jambyl óńiriniń júırigi
2 oryn – «Qoıanqasqa», Almaty óńiriniń júırigi
3 oryn – «Qara aıǵyr», Almaty óńiriniń júırigi
«Altyn tulpardy» tek elorda tóńireginde ǵana emes, elimizdiń basqa óńirlerinde de ótkizgendi jón kórgen Ulttyq sport qaýymdastyǵy kezekti alaman báıgeni Atyraý óńirinde uıymdastyrýda. Jarystyń resmı ataýy – «Altyn tulpar – Jaıyq jaǵasynda» V respýblıkalyq týrnır. Sonymen, bıylǵy jyldyń basty báıgesi 12 qazanda Atyraý oblysy, Mahambet aýdany, Taldykól aýylynyń irgesinde tamashalanbaq. Bul rette, besinshi márte uıymdastyrylatyn «Altyn tulpardyń» elimizdiń batys óńirinde ótýine yqpaldastyq jasaǵan Atyraý oblysynyń ákimi Nurlan Asqaruly Noǵaevtyń azamattyq belsendiligin atap aıtýǵa tıispiz.
Jaıyq jaǵasynda ótetin «Altyn tulpar» báıgesine barlyq júırik jylqy tuqymdary jiberiledi. Elimizdiń 14 oblysy jáne Nur-Sultan, Almaty, Shymkent qalalarynyń árqaısysynan 5 sáıgúlikten qatysady. Júlde qory – 22 mıllıon teńge. Bas júldesi – 10 mıllıon teńge. Aldyńǵy kelgen toǵyz júırikke júlde beriledi.
Atyraý ólkesinde besinshi márte uıymdastyrylatyn bıylǵy aıtýly alamanǵa elimizdiń eń tańdaýly jetpisten astam sáıgúlikteri baq synaıdy dep kútilýde. Bir qyzyǵy, 2015 jyly jáne 2017 jyly «Altyn tulparda» eki ret bas báıge alǵan «Samal» sáıgúliktiń, sondaı-aq, 2017 jylǵy alamanda ekinshi oryn alǵan jetisýlyq júırik «Qoıanqasqanyń» atbegileri baby kelisken tulparlarynyń baǵyn Atyraý topyraǵynda taǵy bir synap kórmekke bekinipti. Sondyqtan, bilikti mamandar pikirinshe Jaıyq jaǵasynda ótetin «Altyn tulpar» báıgesiniń bul jolǵy básekesi tipti erekshe bolmaqshy.
Tólegen JÁKITAI
