تارازدا تۇڭعىش «بەسسايىس» باستالدى

بۇگىن تاراز قالاسىنىڭ ىرگەسىندە جامبىل وبلىستىق سپورت باسقارماسى مەن ۇلتتىق سپورت قاۋىمداستىعىنىڭ ۇيىمداستىرۋىمەن قۇسبەگىلەر اراسىنداعى تۇڭعىش «بەسسايىس» باسەكەسى باستالىپ، اشىلۋ سالتاناتى ءوتتى. بۇل تۋرالى ۇلتتىق سپورت قاۋىمداستىعى حابارلادى.

«بەسسايىس» باسەكەسى تاماشالاناتىن جەر – جامبىل وبلىسى، بەكتوبە اۋىلىنداعى اتشابار (تاراز قالاسىنىڭ اۋماعى). بەسسايىس شارتى – ءار قۇسبەگىدە بۇركىت، قارشىعا، يتەلگى مەن تازى يت بولۋعا ءتيىس. سونداي-اق قۇسبەگىنىڭ ءوزى اۋدارىسپاق جەكپە-جەگىنە شىعادى. تۇڭعىش «بەسسايىس» وسىنداي بەس ءتۇرلى باسەكەدەن تۇرادى.

قازىرگى كەزدە تۋرنيردە الماتى قالاسى، الماتى وبلىسى، جامبىل وبلىسى، تۇركىستان وبلىسى، اتىراۋ وبلىسى، اقتوبە وبلىسى، قاراعاندى وبلىسىنان كەلگەن قۇسبەگىلەر باق سىناۋدا. جارىسقا قاتىسۋشى 16 قۇسبەگى اراسىندا قازاقستان رەسپۋبليكاسىنىڭ بىرنەشە دۇركىن چەمپيونى  باباجان باقداۋلەت (جامبىل وبلىسى)، قۇسبەگىلىكتەن ءىى ازيا  چەمپيونى باباجان بەرىكبولسىن (جامبىل وبلىسى)، قازاقستان چەمپيوندارى پاڭ تولەمىرزا (تۇركىستان وبلىسى)، پاڭ سەيدوللا (تۇركىستان وبلىسى)، ارمان قوشقاروۆ (اتىراۋ وبلىسى) سىندى سپورتتىق جەتىستىكتەرى جوعارى تاجىريبەلى سپورتشىلار بار.

ۇيىمداستىرۋشىلاردىڭ ايتۋىنشا، العاشقى «بەسسايىسقا»  قاتىسۋشىلار قۇستى قولعا شاقىرۋ، شىرعاعا سالۋ، سۇڭقارعا دالباي تەپتىرۋ، قارشىعانى قويانعا، تۇلكىگە سالۋ،  بۇركىتتى تۇلكىگە، شيبورىگە سالۋ، 500 مەترگە تازى جارىستىرۋ سياقتى  باسەكەلەر بويىنشا سىنعا تۇسەدى. سونداي-اق، قۇسبەگىلەر اراسىنداعى اۋدارىسپاق جەكپە-جەگى تاماشالانادى. ال، بولاشاقتاعى «بەسسايىستا» ءار قۇسبەگىدە ءبىر قۇس پەن تازى عانا بولادى. ەسەسىنە ولار اۋدارىسپاق، ارقان تارتۋ جانە جامبى اتۋدان باق سىنايدى.

قۇسبەگىلەر اراسىنداعى تۇڭعىش «بەسسايىس»  تۋرنيرى 26 قازان كۇنى اياقتالادى.