SportPress.kz Qazaqstan sport jańalyqtary
Búgin Taraz qalasynyń irgesinde Jambyl oblystyq sport basqarmasy men Ulttyq sport qaýymdastyǵynyń uıymdastyrýymen qusbegiler arasyndaǵy tuńǵysh «Bessaıys» básekesi bastalyp, ashylý saltanaty ótti. Bul týraly Ulttyq sport qaýymdastyǵy habarlady.
«Bessaıys» básekesi tamashalanatyn jer – Jambyl oblysy, Bektóbe aýylyndaǵy atshabar (Taraz qalasynyń aýmaǵy). Bessaıys sharty – ár qusbegide búrkit, qarshyǵa, ıtelgi men tazy ıt bolýǵa tıis. Sondaı-aq qusbeginiń ózi aýdaryspaq jekpe-jegine shyǵady. Tuńǵysh «Bessaıys» osyndaı bes túrli básekeden turady.
Qazirgi kezde týrnırde Almaty qalasy, Almaty oblysy, Jambyl oblysy, Túrkistan oblysy, Atyraý oblysy, Aqtóbe oblysy, Qaraǵandy oblysynan kelgen qusbegiler baq synaýda. Jarysqa qatysýshy 16 qusbegi arasynda Qazaqstan Respýblıkasynyń birneshe dúrkin chempıony Babajan Baqdáýlet (Jambyl oblysy), qusbegilikten II Azııa chempıony Babajan Berikbolsyn (Jambyl oblysy), Qazaqstan chempıondary Pań Tólemyrza (Túrkistan oblysy), Pań Seıdolla (Túrkistan oblysy), Arman Qoshqarov (Atyraý oblysy) syndy sporttyq jetistikteri joǵary tájirıbeli sportshylar bar.
Uıymdastyrýshylardyń aıtýynsha, alǵashqy «Bessaıysqa» qatysýshylar qusty qolǵa shaqyrý, shyrǵaǵa salý, suńqarǵa dalbaı teptirý, qarshyǵany qoıanǵa, túlkige salý, búrkitti túlkige, shıbórige salý, 500 metrge tazy jarystyrý sııaqty básekeler boıynsha synǵa túsedi. Sondaı-aq, qusbegiler arasyndaǵy aýdaryspaq jekpe-jegi tamashalanady. Al, bolashaqtaǵy «Bessaıysta» ár qusbegide bir qus pen tazy ǵana bolady. Esesine olar aýdaryspaq, arqan tartý jáne jamby atýdan baq synaıdy.
Qusbegiler arasyndaǵy tuńǵysh «Bessaıys» týrnıri 26 qazan kúni aıaqtalady.
