ەلوردا ىرگەسىندە جاپپاي كوكپار جارىسى اياقتالدى

جاپپاي كوكپاردى تاماشالاۋعا  ۇلتتىق سپورت قاۋىمداستىعىنىڭ پرەزيدەنتى، پارلامەنت  ءماجىلىسىنىڭ دەپۋتاتى بەكبولات تىلەۋحان قاتىستى. بۇل تۋرالى ۇلتتىق سپورت قاۋىمداستىعى حابارلادى.

ەلوردا ىرگەسىندەگى تالاپكەر اۋىلىندا حاسەنوۆتەر اۋلەتى ۇيىمداستىرعان بۇل كوكپار – بيىلعى جىلى ارقا توسىندە وتكەن ايتۋلى كوكپاردىڭ ءبىرى.

بۇل جاپپاي كوكپاردى حاسەنوۆتەر اۋلەتى ومىردەن وزعان ارداقتى اكەلەرىن ەسكە الۋ قۇرمەتىنە جاساعان جىلدىق اسقا وراي ۇيىمداستىردى. بەلگىلى اتبەگى حاسەن ۇلى اماندىق اقساقال كەزىندە اقمولا ءوڭىرىنىڭ اۋىل شارۋاشىلىعى سالاسىندا ۇزاق جىلدار تابىستى  ەڭبەك ەتىپ، سوتسياليستىك ەڭبەك ەرى وردەنىن يەلەنگەن، وسى ولكەگە تانىمال تۇلعا. زووتەحنيكا سالاسىنىڭ جوعارى ءبىلىمدى مامانى. جەتى ۇل-قىز تاربيەلەپ وسىرگەن ابزال اكە.

بۇل كوكپارعا ەلىمىزدىڭ ءار وڭىرىنەن كەلگەن باعلان شىرىنباەۆ، ۇلان بايتورەەۆ، نۇرداۋلەت مومىنوۆ، قۇرمانبەك تۇرعانبەك، اسلان قابجانوۆ، ەرلان قانافين  سىندى اتاقتى كوكپارشىلارى قاتىسىپ، دودانىڭ دۋمانىن قىزدىردى. ءتىپتى، ۇلتتىق سپورت تۇرلەرىنىڭ باس باپكەرى قۇراماەۆ قۋانىشبەكتىڭ ءوزى كوكپاردىڭ دوداسىندا توپ جارىپ، ايگىلى بالۋانداردان ايلا اسىرىپ، سالىم سالدى.

جاپپاي كوكپاردى تاماشالاۋعا قاتىسقان ۇلتتىق سپورت قاۋىمداستىعىنىڭ پرەزيدەنتى بەكبولات قاناي ۇلى ءوزىنىڭ قۇتتىقتاۋ سوزىندە حاسەنوۆتەر اۋلەتى ۇيىمداستىرعان كوكپارعا الىستان ات سابىلتىپ ارنايى كەلگەن اتاقتى كوكپارشىلاردىڭ ۇيىمشىلدىقتارىنا،  ارقا توسىندە، ەلوردانىڭ ىرگەسىندە  وسىنداي جاپپاي كوكپاردىڭ وتۋىنە ۇيىتقى بولعان اتبەگى امانجول اماندىق ۇلى مەن ونىڭ اعايىن-تۋىستارىنا شىنايى العىسىن جەتكىزدى. «ەلىمىزدىڭ تاۋەلسىزدىگى، حالقىمىزدىڭ بەيبىتشىلدىگى ارقاسىندا تالاي اسىل دۇنيەمىز جاندانۋدا. سونىڭ ىشىندە ۇلتتىق سپورتىمىز الەمدىك دەڭگەيگە كوتەرىلدى. مىنە، ارقانىڭ توسىندەگى جاپپاي كوكپارعا ەلىمىزدىڭ اتاقتى بالۋاندارى ارنايى قاتىسىپ وتىر. سونىڭ بارلىعى ەڭ الدىمەن ءداستۇرلى ويىندى وسىلايشا  ۇنەمى قولداپ، قوشامەتتەي بىلگەن قالىڭ جانكۇيەردىڭ، ياعني، سىزدەردىڭ ارقالارىڭىزدا» دەپ، جاپپاي كوكپاردى كورۋگە جينالعان كوپشىلىككە دەگەن ءوز ريزاشىلىعىن ءبىلدىردى.

ەسكە سالا وتسەك، بۇل جاپپاي كوكپاردىڭ سالىم جۇلدەسىنە – 1 ميلليون تەڭگە جانە  2 تانا، 2 جاباعى، 2 تاي، 2 ات، 2 تۇيە تىگىلدى. «وگىز ءولدى» سالىمىنا ەكى تۇيە اتالدى. قوستاناي، سولتۇستىك قازاقستان، تۇركىستان، جامبىل، اقمولا وبلىستارىنان كەلگەن ايتۋلى كوكپارشىلارى اراسىنان دوداشىل اتىنا سەنىپ، وزگەلەردەن ايلاسى مەن شەبەرلىگىن اسىرعان بىرنەشە بالۋاندار سالىم سالىپ، كورەرمەن قوشامەتىنە بولەندى. ال، جاپپاي كوكپاردىڭ اياقتالعانىن بىلدىرەتىن «وگىز ءولدى» سالىمىنىڭ ءبىرىن كوكپاردىڭ جاس بالۋانى قۇرمانبەك تۇرعانبەك سالسا، ەكىنشىسىن ايگىلى كوكپار بالۋانى باعلان شىرىنباەۆ سالدى.