Aǵylshyndar qazaq balasyna qurmet kórsetti

Belgili qalamger, qazaq sport jýrnalıstıkasynyń ardageri Nesip Júnisbaevtyń uly Aıdyn Júnisbaev «Manchester ıýnaıted» (Anglııa) jəne «Qaırat» (Almaty) klýbtarynyń jankúıeri. Sonymen birge ol aǵylshyn komandasynyń fan-klýbynyń múshesi.

Jaqynda Nesaǵańnyń Almatydaǵy úıine Tumandy Albıonnan qýanyshty habar kelip jetti. Onyń uly Aıdyn ÝEFA Sýperkýbogy úshin ótetin matchqa bıletti jeńip alypty. Al bul oıyn Makedonııada «Real» (Madrıd) men «Manchester ıýnaıted» klýbtarynyń arasynda ótetini belgili.

— Bul biz úshin keremet oqıǵa. Aǵylshyndardyń ataqty komandasy Aıdynǵa bılet jiberipti. Ǵajap emes pe? Bizdiń klýbtar osyndaıdy isteı alar ma eken?!, — deıdi jazýshy.

Odan əri N.Júnisbaev whatsapp jelisimen bizge jazǵan hatynda bylaı dedi:

— Bul bıletti ərkim aqshaǵa satyp ala alady. Əýeli Aıdyn da solaı istegisi kelgen. Ol bılettiń baǵasyn suraǵanda Anglııadaǵy aǵaıyndar 800 eýro depti. Al Qazaqstandaǵy alypsatarlar 700 eýro degen eken. Biraq aǵylshyndar Aıdynnyń «Manchester ıýnaıted» komandasynyń atyna bılet suraǵan hatyn jəne onyń fan-klýbtyń múshesi ekenin eskerip, ózderiniń jankúıerleri arasynda 6 000 bılettiń lotoreıasy oınatylatynyn aıtypty. Sóıtip, Aıdyn saıt arqyly lotoreıaǵa qatysyp, sonyń jeńimpazy atanady. Úsh kúnnen keıin Anglııadan Aıdynǵa 6000 bılettiń bireýi buıyrǵany týraly hat keldi.

Nesaǵańnyń aıtýynsha, bul oqıǵany balasyn nasıhattaý úshin aıtyp jatqan joq.

— Muny men «Manchester ıýnaıted» sııaqty ataqty komandanyń jankúıerlerine degen qurmetin kórsetip, sodan qazaqstandyq klýbtardyń úlgi alsa degen oımen aıtyp otyrmyn, — deıdi.

Biz de N.Júnisbaevtyń osy oıyna tolyq qosylamyz. Qazir qazaq sportyna halyqtyń komandaǵa nemese jekelegen adamdarǵa jankúıerligi ǵana emes, sportshylardyń da ózderiniń fanattaryna janashyrlyǵy kerek.

Dastan KENJALIN