SportPress.kz قازاقستان سپورت جاڭالىقتارى
جۋىردا ۇلتتىق سپورت تۇرلەرى قاۋىمداستىعىنا قازاقستانداعى اقش ەلشىلىگىنەن ۇسىنىس-حات كەلدى. بۇل ۇسىنىس-حاتتا قازاقستاننىڭ كوكپارشىلارى مەن كوكپار ماماندارىنا اقش-قا كەلىپ كوماندالىق كوكپار ويىنىنىڭ قىر-سىرىن ەگەجەي-تەگجەيلى ۇيرەتۋ ءوتىنىشى ايتىلعان. بۇل تۋرالى ulttyqsport.kz حابارلادى.
نەگىزىندە، مۇنداي ۇسىنىس اقش كوكپار قۇراماسى تاراپىنان استانادا وتكەن الەم چەمپيوناتى كەزىندە دە ايتىلعان. اقش قۇراما كومانداسى الەمدىك چەمپيوناتقا ەكى اپتا بۇرىن كەلىپ، ەلوردا ىرگەسىندەگى قاراوتكەل ەلدى مەكەنىندە وقۋ-جاتتىعۋ جيىنىن وتكىزدى. امەريكالىق كوكپارشىلاردى اقمولا وبلىستىق كوكپار كومانداسىنىڭ باس باپكەرى ەرعالي توقاباەۆ جاتتىقتىردى. جارىس كەزىندە اقش كوماندا كاپيتانى كريد گارنيك كوكپاردىڭ مايتالمان باپكەرى ەرعالي توقاباەۆقا ريزالىعىن قايتا-قايتا ايتقان-تىن. ونىڭ ايتۋىنشا امەريكالىقتار كوكپار ويىنى ءۇشىن قىرعىزستانعا بۇعان دەيىن ەكى مارتە بارعان. بىراق، كوكپاردىڭ قىر-سىرىن قازاقستانعا كەلىپ جاتتىققاندا عانا تەرەڭ تۇسىنە باستاپتى.
چەمپيونات بارىسىندا امەريكالىق كوكپارشىلاردىڭ ءار كەزدەسۋ سايىن شەبەرلىكتەرىن ۇشتاي ءتۇسىپ، ءتىپتى، سوڭعى قارسىلاستارىمەن تابان تىرەسە ويناپ، ەڭ ازۋلى دەگەن قىرعىزستان كوكپارشىلارىمەن جاعالاسا ءجۇرىپ، ۇپاي سانىن التىعا جەتكىزگەنى كوپشىلىكتى قاتتى تاڭداندىرعان. وسى تۇستا تۇركى حالىقتارىنىڭ ءداستۇرلى سپورت تۇرلەرى حالىقارالىق قاۋىمداستىعىنىڭ پرەزيدەنتى بەكبولات تىلەۋحاننىڭ شەتەلدىك كوماندالاردى قارسى الۋ جيىنىندا ۇلتتىق سپورت تۇرلەرى قاۋىمداستىعىنىڭ ءبىر جىل بۇرىن جولداعان ارنايى شاقىرتۋىن قابىل الىپ، امەريكالىق سپورتشىلاردىڭ كوكپاردان وتەتىن الەم چەمپيوناتىنا قاتىسۋىنا ىقپال جاساعان قازاقستانداعى اقش ەلشىلىگىنە ريزاشىلىعىن بىلدىرگەن بولاتىن
«قاي سالاعا كىرىسسە دە سونى جانداندىرىپ، سول سالادا وزىپ شىعىپ، الەمدى تاڭداندىراتىن امەريكانىڭ ەندى كوكپار ويىنىنا كوڭىل اۋدارعانى ءبىزدى قاتتى قۋانتتى. اقش ازاماتتارىنىڭ كوكپار ويناي باستاۋى – كوكپار باعىنىڭ جانعانى دەپ تۇسىنەمىز. كوكپار ويىنى ەندى جانداۋعا ءتيىس»، دەگەن ەدى بەكبولات تىلەۋحانوۆ.
راسىندا دا، ايدان اسا ۋاقىت وتكەندە امەريكالىقتاردىڭ كوكپار ۇيرەنۋگە بەل شەشە كىرىسكەنى انىق بولدى. الايدا، استانادا وتكەن ءى الەم چەمپيوناتىنا كوماندا جيناپ كەلگەندەر اقش-تىڭ ۆايومينگ شتاتىنىڭ بوزمەن، دجەكسون اتتى قالالارىندا تۇراتىن ازاماتتار. وزدەرىنىڭ ايتۋلارىنشا، ۆايومينگ شتاتى قارشادايىنان رودەۋمەن (شۋ اساۋ اتقا، بۇقاعا ءمىنىپ ونەر كورسەتۋ) شۇعىلدانىپ، ات قۇلاعىندا ويناپ وسكەن ناعىز امەريكالىق كوۆبويلاردىڭ ەڭ كوپ تۇراتىن ولكەسى.
قازاقستانداعى اقش ەلشىلىگىنىڭ ۇلتتىق سپورت تۇرلەرى قاۋىمداستىعىنا جولداعان ۇسىنىس-حاتىندا قازاقتىڭ كوكپارشى-ماماندارى، جاتتىقتىرۋشىلارى سول ۆايومينگ شتاتىنا بارىپ كوماندالىق كوكپار ويىنىن ۇيرەتۋدى وتىنگەن. ەگەر نەشە ماماننىڭ باراتىنى، جاتتىقتىرۋعا قانشا ۋاقىتتىڭ جۇمسالاتىنى انىقتالسا، ولاردىڭ بارلىق قاراجات شىعىنىن شاقىرۋشى جاقتىڭ وتەيتىنى ايتىلعان. سونداي-اق، الداعى چەمپيوناتتىڭ قاشان ۇيىمداستىرىلاتىنى تۋرالى سۇرالعان.
وسىعان دەيىن مۇنداي ۇسىنىستى ۇلتتىق سپورت تۇرلەرى قاۋىمداستىعىنا تاجىكستاننىڭ «بۋزكاشي» فەدەراتسياسىنىڭ باسشىلارى دا جاساعان بولاتىن. كوكپاردان وتكەن ازيا چەمپيوناتىنىڭ جانە الەم چەمپيوناتىنىڭ قولا جۇلدەسىن يەلەنگەن تاجىكستان كوكپار قۇراما كومانداسىنىڭ جەتەكشىلەرى بىلىكتى ماماندار ارقىلى كوكپارشىلارىنىڭ شەبەرلىگىن تاعى دا شىڭداعىسى كەلەدى.
مىنە، ەندى جۋىردا ءبىزدىڭ ەلدىڭ بىرنەشە تاجىريبەلى كوكپار ماماندارى اقش-تىڭ كوكپار كومانداسىن جاتتىقتىرۋعا اتتانىپ كەتۋى مۇمكىن. قازىرگى كەزدە امەريكالىق كوكپارشىلاردى جاتتىقتىرۋعا كىمدەردىڭ جىبەرىلەتىنى، جالپى ساپاردىڭ بارىسى انىقتالۋ ۇستىندە.
