SportPress.kz Qazaqstan sport jańalyqtary
Jýyrda Ulttyq sport túrleri qaýymdastyǵyna Qazaqstandaǵy AQSh elshiliginen usynys-hat keldi. Bul usynys-hatta Qazaqstannyń kókparshylary men kókpar mamandaryna AQSh-qa kelip komandalyq kókpar oıynynyń qyr-syryn egejeı-tegjeıli úıretý ótinishi aıtylǵan. Bul týraly ulttyqsport.kz habarlady.
Negizinde, mundaı usynys AQSh kókpar quramasy tarapynan Astanada ótken álem chempıonaty kezinde de aıtylǵan. AQSh qurama komandasy álemdik chempıonatqa eki apta buryn kelip, elorda irgesindegi Qaraótkel eldi mekeninde oqý-jattyǵý jıynyn ótkizdi. Amerıkalyq kókparshylardy Aqmola oblystyq kókpar komandasynyń bas bapkeri Erǵalı Toqabaev jattyqtyrdy. Jarys kezinde AQSh komanda kapıtany Krıd Garnık kókpardyń maıtalman bapkeri Erǵalı Toqabaevqa rızalyǵyn qaıta-qaıta aıtqan-tyn. Onyń aıtýynsha amerıkalyqtar kókpar oıyny úshin Qyrǵyzstanǵa buǵan deıin eki márte barǵan. Biraq, kókpardyń qyr-syryn Qazaqstanǵa kelip jattyqqanda ǵana tereń túsine bastapty.
Chempıonat barysynda amerıkalyq kókparshylardyń ár kezdesý saıyn sheberlikterin ushtaı túsip, tipti, sońǵy qarsylastarymen taban tirese oınap, eń azýly degen Qyrǵyzstan kókparshylarymen jaǵalasa júrip, upaı sanyn altyǵa jetkizgeni kópshilikti qatty tańdandyrǵan. Osy tusta Túrki halyqtarynyń dástúrli sport túrleri halyqaralyq qaýymdastyǵynyń prezıdenti Bekbolat Tileýhannyń sheteldik komandalardy qarsy alý jıynynda Ulttyq sport túrleri qaýymdastyǵynyń bir jyl buryn joldaǵan arnaıy shaqyrtýyn qabyl alyp, amerıkalyq sportshylardyń kókpardan ótetin álem chempıonatyna qatysýyna yqpal jasaǵan Qazaqstandaǵy AQSh elshiligine rızashylyǵyn bildirgen bolatyn
«Qaı salaǵa kirisse de sony jandandyryp, sol salada ozyp shyǵyp, álemdi tańdandyratyn Amerıkanyń endi kókpar oıynyna kóńil aýdarǵany bizdi qatty qýantty. AQSh azamattarynyń kókpar oınaı bastaýy – kókpar baǵynyń janǵany dep túsinemiz. Kókpar oıyny endi jandaýǵa tıis», degen edi Bekbolat Tileýhanov.
Rasynda da, aıdan asa ýaqyt ótkende amerıkalyqtardyń kókpar úırenýge bel sheshe kiriskeni anyq boldy. Alaıda, Astanada ótken I Álem chempıonatyna komanda jınap kelgender AQSh-tyń Vaıomıng shtatynyń Bozmen, Djekson atty qalalarynda turatyn azamattar. О́zderiniń aıtýlarynsha, Vaıomıng shtaty qarshadaıynan rodeýmen (shý asaý atqa, buqaǵa minip óner kórsetý) shuǵyldanyp, at qulaǵynda oınap ósken naǵyz amerıkalyq kovboılardyń eń kóp turatyn ólkesi.
Qazaqstandaǵy AQSh elshiliginiń Ulttyq sport túrleri qaýymdastyǵyna joldaǵan usynys-hatynda qazaqtyń kókparshy-mamandary, jattyqtyrýshylary sol Vaıomıng shtatyna baryp komandalyq kókpar oıynyn úıretýdi ótingen. Eger neshe mamannyń baratyny, jattyqtyrýǵa qansha ýaqyttyń jumsalatyny anyqtalsa, olardyń barlyq qarajat shyǵynyn shaqyrýshy jaqtyń óteıtini aıtylǵan. Sondaı-aq, aldaǵy chempıonattyń qashan uıymdastyrylatyny týraly suralǵan.
Osyǵan deıin mundaı usynysty Ulttyq sport túrleri qaýymdastyǵyna Tájikstannyń «Býzkashı» federaııasynyń basshylary da jasaǵan bolatyn. Kókpardan ótken Azııa chempıonatynyń jáne álem chempıonatynyń qola júldesin ıelengen Tájikstan kókpar qurama komandasynyń jetekshileri bilikti mamandar arqyly kókparshylarynyń sheberligin taǵy da shyńdaǵysy keledi.
Mine, endi jýyrda bizdiń eldiń birneshe tájirıbeli kókpar mamandary AQSh-tyń kókpar komandasyn jattyqtyrýǵa attanyp ketýi múmkin. Qazirgi kezde amerıkalyq kókparshylardy jattyqtyrýǵa kimderdiń jiberiletini, jalpy sapardyń barysy anyqtalý ústinde.
