ياروسلاۆ ششيلحاۆى: «ويىندا جاڭا تاكتيكانى قولدانامىز»

«سلاۆيا» كومانداسىنىڭ باس باپكەرى ياروسلاۆ ششيلحاۆى ەۋروپا ليگاسىنىڭ توپتىق كەزەڭىندە «استاناعا» قارسى كەزدەسۋ تۋرالى ءوز ويىن ايتتى.

– «استانانىڭ» ويىنى جايلى قانداي ويداسىز؟

– «استانادا» مىقتى ويىنشىلار جينالعان. ولاردا ەۋروپا فۋتبولىندا ويناعان تاجىريبەلى فۋتبولشىلارى بار. ءبىز «سەلتيككە» قارسى ويىندى كورىپ شىقتىق. «ۆيلياررەالعا» قارسى كەزدەسۋدى دە تالدادىق. جاقسى ويىن كورسەتتى. بىرنەشە مۇمكىندىگى بولدى.

– ءسىز 4-5-1 سىزبانۇسقاسىن قولدانعاندى ۇناتادى دەپ ەستىدىك. بۇل شىنىمەن سولاي ما؟

– دايىندىعىمىزدى ەگجەي-تەگجەيلى ايتقاندى ۇناتپايمىن. راس، وسى نۇسقانى قولدانامىز. ويىن بارىسىندا 4-3-3 نۇسقاسىن دا قولدانۋىمىز مۇمكىن. «استانانى» جەڭۋ ءۇشىن بىرنەشە جوسپار قۇردىق.

– «استانا» بىرنەشە ويىن ءوز الاڭىندا ۇتىلماي كەلەدى. ەرتەڭ جەڭىلەمىز دەپ ويلامايسىز با؟

– ءبىز ءار ويىندا جەڭىسكە جەتكىمىز كەلەدى. ەشكىمنەن قورىقپايمىز. ەرتەڭ جەڭۋگە تىرىسامىز.

– قازاقستان ۇلتتىق قۇراماسىنىڭ بۇرىنعى باپكەرى ميروسلاۆ ۆەرانەك قازىر ءسىزدىڭ كومانداڭىزدا قىزمەت ەتەدى. دايىندىق بارىسىندا ونىمەن اقىلداستىڭىز با؟

– بۇگىنگە دەيىن «استانادا» ايتارلىقتاي وزگەرىستەر بولدى. ميروسلاۆ ۆەرانەكپەن اقىلداسقانىم راس. بىراق ونى اسا ماڭىزدى دەپ ويلامايمىن. بىزدە وزگە قيىندىقتاردىڭ بارىن ايتا كەتەيىن. اۋا-رايىندا 20 گرادۋس ايىرماشىلىق بار، ۋاقىت ايىرماشىلىعى دا بار. بىراق ءبىز تەز ارادا بەيىمدەلۋىمىز كەرەك. سونىمەن قاتار، ءبىز العاشقى ويىندا جەڭىسكە جەتتىك. ال «استانا» فاۆوريت كومانداعا ەسە جىبەردى. سوندىقتان ەرتەڭ «استانا» جەڭىسكە جەتۋ ءۇشىن بارىن سالادى دەپ ويلايمىن. ەۋروپا ليگاسىندا ءار كوماندا ءۇشىن ءبىر ۇپاي بولسا دا ماڭىزى زور.

– جاساندى الاڭ كەدەرگى كەلتىرەدى دەپ ويلايسىز با؟ «سلاۆيا» ءۇشىن چەحيا چەمپيوناتىنداعى ءوز ورنىن ساقتاپ قالۋ ماڭىزدى ما، الدە…

– چەحيادا ەشكىم جاساندى الاڭدا وينامايدى. بىراق بۇل بىزگە سىلتاۋ ەمەس. ەرتەڭگى ويىندا جەڭىسكە دەگەن قۇلشىنىسىمىزعا كەدەرگى كەلتىرەدى دەپ ويلامايمىن. ءبىز ءۇشىن چەمپيونات تا، ەۋروپا ليگاسى دا ماڭىزدى.

ايتا كەتەيىك، «استانا» مەن «سلاۆيا» اراسىنداعى كەزدەسۋ ەرتەڭ ساعات 21:00-دە باستالادى.