قۇلاحمەت قارسىلاسىن قۇلاتتى

بىرىككەن اراب امىرلىكتەرىنىڭ ء(باا) دۋباي قالاسىندا كاسىپقوي بوكس كەشى ءوتتى.

وسى جارىستا كۇش سىناسقان تۇرسىنباي قۇلاحمەت ورەلى ونەرىمەن ءوز جانكۇيەرلەرىن قۋانتتى.

جانكۇيەرلەر تۇرسىنبايدى اۋەسقوي بوكسشى رەتىندە جاقسى بىلەدى. 75 كيلو سالماق دارەجەسىندە جۇدىرىقتاسقان ول 2019 جىلى ازيا چەمپيونى اتانىپ، الەم بىرىنشىلىگىندە قولا مەدالدى يەلەندى. بىلتىر كاسىپقويلار اراسىندا كۇش سىناسۋعا بەل بۋدى. سول كەزدەن بەرى ەكى كەزدەسۋ وتكىزىپ، ەكەۋىندە دە جەڭىسكە جەتتى.

پارسى جاعالاۋىندا قانداسىمىز حەبەر روندونمەن قولعاپ ءتۇيىستىردى. ۆەنەسۋەلا وكىلىنىڭ ءبىزدىڭ بوكسشىعا قاراعاندا تاجىريبەسى الدەقايدا زور. ول وسى كۇنگە دەيىن 20 رەت رينگكە شىعىپ، بارلىق قارسىلاسىنان باسىم ءتۇستى. 13 باسەكەنى نوكاۋتپەن اياقتادى. سوعان قاراماستان قۇلاحمەت روندوندى ءبىرىنشى راۋندتا ۇرىپ جىعىپ، ءبىرىنشى ورتا سالماقتاعى وزىنە تيەسىلى WBC International نۇسقاسى بويىنشا التىن بەلبەۋدى ساقتاپ قالدى.

جەكپە-جەكتەن كەيىن ول وتانداستارىمىزعا قولداۋ كھرسەتكەندەرى ءۇشىن ريزاشىلىعىن ءبىلدىرىپ، ينستاگرام الەۋمەتتىك جەلىسىندەگى پاراقشاسى ارقىلى العىس ايتتى.

–اسسالاۋماعالەيكۋم! الحامدۋليللياح ەلىمنىڭ سەنىمىن اقتاپ، كوك تۋىمىزدى جەلبىرەتكەنىمە قۋانىشتىمىن. بۇل تەك باستاماسى دەپ ويلايمىن. قۇتتىقتاۋ ىزگى نيەتتەرىڭىزگە كوپ راحمەت!، – دەدى ول.

سول كەشتە دۋبايدا جانقوش تۇراروۆ تا ونەر كورسەتۋگە ءتيىس ەدى. الايدا قازاق بوكسشىسىنىڭ كوروناۆيرۋس دەرتىنە شالدىققانى انىقتالىپ، بۇل جەكپە-جەك كەيىنگە شەگەرىلدى.

عالىم سۇلەيمەن،

الماتى