Spartakıada: Juma namazǵa jınalǵan jamaǵat jarysty

Azamattardyń  durys baǵytta júrip, olardyń týra joldan taımaýy úshin Almaty qalalyq Din isteri basqarmasy dástúrli Islamnyń san ǵasyrlyq ónegesin nasıhattap keledi. Tipti, dindar azamattardyń sportpen úzdiksiz aınalysýy úshin de bar jaǵdaıdy jasaýda. «Ulttyq mura» baǵdarlamasy men qalalyq Din isteri jónindegi basqarmasy birlese ótkizgen kezekti Spartakıada alyp shahar Almaty qalasynyń bes birdeı meshitinde ótti.

Juma namazǵa jınalǵan kópshilik Konstıtýııa kúnine oraı uıymdastyrylǵan Spartakıada barysynda arqan tartý, qoshqar kóterý, asyq atý, armrestlıng sekildi sport túrlerinen baq synady.

Jınalǵan jamaǵattyń nazaryn ózine aýdarǵan – Qoshqar kóterý saıysy boldy. Shyn myqtylar básekesinde Qaster Sarqytbek jeńimpaz atandy. Ol 2 mınýtta qoshqardy 75 ret kóterip, syıǵa tigilgen óz júldesin jetegine baılap alyp ketti. Arqan tartýshylar saıysynda uıymshyldyq tanytqan «Kóksaraı» tobynyń apaıtós jigitteri top jardy. Al bilekti jigitterdiń básekesi – armrestlıngte Abzal Pirimbek qarsylas shaq keltirmeı, tuǵyr bıiginen kórindi. Asyq atýda ulttyq sportymyzdy myqty meńgergen Tahır Ǵarıfolla mergendik tanytyp, bas júldeni ıelendi.

Jamaǵat arasyndaǵy jarystarǵa kópshiliktiń qyzyǵýshylyǵy jyl sanap artyp keledi. О́zim jýyrda Qonaev qalasynda ótken alyptar saıysyna qatysyp, júldeger atanǵan edim. Jamaǵat arasyndaǵy jarysty estigen soń «nege qatyspasqa», degen oı keldi.  Armrestlıng, qoshqar kóterý saıysynda kúshimdi synap kórdim. Birinde alǵashqy úshtikke ensem, endi birinde jeńimpaz atandy. Jalpy, osyndaı sporttyq sharalar jıi ótkizilse, eldiń rýhanııaty kóterilip, meshit jamaǵatynyń birligi nyǵaıa túsedi, — dedi qoshqar kóterý saıysynyń jeńimpazy Qaster Sarqytbek.

Qala turǵyndaryn sportpen úzdiksiz aınalysýyn qamtamasyz etýge arnalǵan biregeı jobanyń maqsaty – qala turǵyndaryn júıeli túrde dene tárbıesi men sportqa tartý, buqaralyq sportty damytý jáne salaýatty ómir saltyn ustanýǵa shaqyrý. Dástúrli dinder arasyndaǵy aýyzbirlik pen tatýlyqty, tynyshtyq pen turaqtylyqty, beıbitshilik pen yntymaqty dáripteý. Jarys sońynan jeńimpazdar men júldegerler  uıymdastyrýshylardyń baǵaly syılyqtarymen marapattaldy.

Ázız TASTAEV,

Foto: Olga APELGANE,

ALMATY