تۇركىستاندا تۇڭعىش رەت «Turan Barysy» تۋرنيرى وتەدى

29 قازاندا تۇركىستان قالاسىندا «Olympic center» سپورت سارايىندا العاش رەت قازاقتىڭ ۇلتتىق كۇرەسىنەن «Turan Barysy» ازيا كۋبوگى وتەدى. جارىسقا ەلىمىزدىڭ بالۋاندارىمەن بىرگە تۇركى مەملەكەتتەرى ۇيىمىنا مۇشە تۇركيا، تۇرىكمەنستان، وزبەكستان، ازەربايجان، قىرعىزستان مەن ماجارستاننىڭ وكىلدەرى قاتىسادى.

قازاق كۇرەسى بالۋاندارى 18 جاستان اسقان جەتى ادامنان تۇراتىن كوماندالار اتىنان سىنعا تۇسەدى. سپورتشىلار جەتى سالماق (55 كگ، 60 كگ، 66 كگ، 74 كگ، 82 كگ، 90 كگ-قا دەيىن جانە 90 كيلودان اسا سالماقتا) دارەجەسىندە بەلدەسەدى.

تۋرنير ەلىمىزدەگى ۇلتتىق سپورت ءتۇرىن دامىتۋ جانە قولداۋ ماقساتىندا وتكىزىلەدى.

«Qazaq kuresi» قاۋىمداستىعىنىڭ باس ديرەكتورى ەربول مىرزابوسىنوۆتىڭ ايتۋىنشا، تۋرنير ءتول كۇرەسىمىزدى الەمدىك ارەنادا ودان ءارى دامىتۋعا سەپتىگىن تيگىزەدى.

29 قازاندا العاش رەت «Turan Barysy» ءتۋرنيرى بولادى. تۇركىستان قالاسى كەزدەيسوق تاڭدالمادى. ول قاتىسۋشى ەلدەردىڭ مۇددەسىن بىرىكتىرەتىن تۇركى الەمىنىڭ استاناسى سانالادى، – دەدى ەربول مىرزابوسىنوۆ.

بۇگىندە ەلىمىزدە 120 مىڭنان استام بالا مەن ءجاسوسپىرىم سپورتتىڭ وسى تۇرىمەن شۇعىلدانادى. ۇلتتىق سپورتتى ناسيحاتتاۋ ماقساتىندا شەتەلدە 30-دان استام قازاق كۇرەسى فەدەراتسياسى جۇمىس ىستەيدى.

تەك قازاقستاننىڭ وزىندە ءارتۇرلى دەڭگەيدە 800 استام جارىس وتكىزىلەدى. سونىمەن بىرگە حالىقارالىق دەڭگەيدە ازيا كۋبوگى، ازيا جانە الەم چەمپيوناتتارى سەكىلدى حالىقارالىق تۋرنيرلەر وتەدى، —  دەپ اتاپ ءوتتى «Qazaq kuresi» قاۋىمداستىعىنىڭ باس ديرەكتورى.

«Qazaqstan Barysy» قازاق كۇرەسىن قولداۋ جانە دامىتۋ قورىنىڭ اتقارۋشى ديرەكتورى سەرىكبول ءورازاليننىڭ ايتۋىنشا، جارىسقا مىقتى بالۋاندار قاتىسادى.

Qazaqstan Barysy» قورى 10 جىل بويى ۇلتتىق سپورت ءتۇرىن قولداۋ جانە دامىتۋمەن اينالىسىپ كەلەدى. «قازاقستان بارىسى»، «الەم بارىسى»، «ەۋرازيا بارىسى» سەكىلدى تۋرنيرلەر وتكىزەمىز. مۇنداي ءىس-شارالار وتانداستارىمىز بەن شەتەلدىك اۋديتوريانىڭ قازاقستاننىڭ مادەنيەتى مەن سالت-داستۇرىنە، ۇلتتىق كۇرەسكە دەگەن نازارىن اۋدارادى دەپ سەنىممەن ايتا الامىز. جالپى جۇلدە قورى 20 ملن تەڭگە، — دەدى سەرىكبول ورازالين.

تۋرنير مادەنيەت جانە سپورت مينيسترلىگى مەن تۇركىستان وبلىسى اكىمدىگىنىڭ قولداۋىمەن «Qazaqstan Barysy» قازاق كۇرەسىن قولداۋ جانە دامىتۋ قورى، «Qazaq kuresi» قاۋىمداستىعى، «تۋريزم مەن سپورتتى قولداۋ جانە دامىتۋ قورى» كق ۇيىمداستىرىلىپ جاتىر.

جانكۇيەرلەر ءتۋرنيردى Qazsport جانە TRT Avaz تەلەارنالارىنان تىكەلەي ەفيردەن تاماشالاي الادى.

اقسۇلۋ ارزىقۇلوۆا،

قوسىمشا اقپارات بويىنشا +7702 888 31 38