ايدوس سۇلتانعالي – الەم كۋبوگىنىڭ قولا جۇلدەگەرى!

ازەربايجاننىڭ استاناسى باكۋ قالاسىندا گرەك-ريم كۇرەسىنەن الەم كۋبوگى ءۇشىن تۋرنير اياقتالدى. جىلدىڭ قورىتىندى باسەكەسىنە ايدوس سۇلتانعالي العاش رەت جاساقتالعان الەم قۇراماسى ساپىندا قاتىستى.

ول تۇرىك بالۋانى مۋكرەمين اقتاستان 7:1 ەسەبىمەن باسىم ءتۇسىپ، كوماندانىڭ جۇلدەنى جەڭىپ الۋىنا ۇلەس قوستى. الەم قۇراماسى مەن تۇركيا اراسىنداعى تەكەتىرەس 5:5 ەسەبىمەن اياقتالعان. بىراق ناتيجەلى ۇپاي بويىنشا 22:19 ەسەبىمەن الەم قۇراماسى جەڭىپ كەتتى.

بوزكىلەم شەبەرى كىركۇيەكتە بەلگرادتا وتكەن الەم چەمپيوناتىندا ءوز سالماعىندا (60 كەلىگە دەيىن) ۇزدىك ۇشتىكتەن كورىنگەن ەدى. سول كەزدە ونىڭ مەدالى گرەك-ريم كۇرەسىنەن ۇلتتىق قۇرامانىڭ جالعىز جۇلدەسى بولدى.

داستان كەنجالين،

استانا