جەتىسۋ وبلىسىندا زاماناۋي شاڭعى-بياتلون كەشەنى سالىنادى

جەتىسۋ وبلىسىندا قازىرگى زامانعى شاڭعى–بياتلون كەشەنى سالىنادى. بۇل تۋرالى پپارلامەنت سەناتى دەپۋتاتتارىنىڭ ساۋالىنا پرەمەر-مينيستر ءاليحان سمايىلوۆتىڭ جاۋابىندا ايتىلعان.

«قازىرگى ۋاقىتتا جەتىسۋ وبلىسىندا 25 بالالار-جاسوسپىرىمدەر سپورت مەكتەبى (بۇدان ءارى – بجسم) بار. وندا 22 533 ادام وقيدى. ونىڭ ىشىندە شاڭعى جارىسىمەن 121 وقۋشى اينالىسادى. ولارمەن 6 جاتتىقتىرۋشى جۇمىس ىستەيدى. الاكول جانە سارقان اۋداندارىندا جەتىسۋ وبلىسى اكىمدىگىنىڭ دەنە شىنىقتىرۋ جانە سپورت باسقارماسىنىڭ قىسقى سپورت تۇرلەرىن دامىتۋ بويىنشا بجسم جۇمىس ىستەيدى»، — دەدى ءاليحان سمايىلوۆ.

ونىڭ ايتۋىنشا، بيىل سارقان اۋدانىنىڭ چەركاس اۋىلدىق وكرۋگىندە شاڭعى سپورتىن دامىتۋ ءۇشىن «امانات» جشس قاراجاتى ەسەبىنەن 800 جانە 200 مەتر بۋگەل كوتەرگىشتەرى (تاۋ شاڭعىشىلارى مەن سنوۋبوردشىلاردى تاۋعا سۇيرەۋگە ارنالعان جابدىق) بار «تەرەكتى شاڭعى بازاسى» سالىنىپ، پايدالانۋعا بەرىلدى. دەمەۋشىلىك قاراجات سوماسى 120 ملن تەڭگە بولدى.

«مەملەكەت باسشىسىنىڭ 2022 جىلعى 20 قازانداعى جەتىسۋ وبلىسىنا جۇمىس ساپارى بارىسىندا بەرگەن تاپسىرماسىن ىسكە اسىرۋ ءۇشىن ءوڭىر اكىمدىگى بولجامدى بىرجولعى وتكىزۋ قابىلەتى 250-300 ادام جانە جالپى قۇنى شامامەن 20 ملرد تەڭگە بولاتىن قازىرگى زامانعى شاڭعى – بياتلون كەشەنىن سالۋ ءۇشىن 20-25 گەكتار جەر ءبولۋ ماسەلەسىن پىسىقتاۋدا. سارقان اۋدانى مەن تەكەلى قالاسى قىسقى سپورت تۇرلەرىن دامىتۋعا نەعۇرلىم قولايلى ايماق بولعانىنا بايلانىستى قۇرىلىس سالۋعا جەر ۋچاسكەسىن تاڭداۋ جانە ءبولۋ ءۇشىن جەتىسۋ وبلىسى اكىمدىگىنىڭ سالالىق باسقارمالارىنىڭ وكىلدەرىنەن كوميسسيا قۇرۋ جوسپارلانعان. كەشەندە شاڭعى جارىسى، بياتلون، سنوۋبورد، فريستايل موگۋل جانە اكروباتيكا سياقتى قىسقى سپورت تۇرلەرىن دامىتۋ كوزدەلەدى. كەشەننىڭ قۇرىلىسى 2024-2027 جىلدارعا ارنالعان رەسپۋبليكالىق جانە جەرگىلىكتى بيۋدجەتتەر قاراجاتى ەسەبىنەن بولجانادى»، — دەدى ۇكىمەت باسشىسى.

داستان كەنجالين