جاس تەننيسشى روبەرت كامينسكي ءۇشىنشى رەت جەڭىمپاز اتاندى

روبەرت كامينسكي ليتۆانىڭ استاناسى ۆيلنيۋس قالاسىندا 12 جاسقا دەيىنگىلەر اراسىندا وتكەن ەكىنشى ساناتتاعى Tennis Europe تۋرنيرىندە جەڭىمپاز اتاندى.

قازاقستان تەننيس فەدەراتسياسىنىڭ حابارلاۋىنشا، ەلىمىزدىڭ جاس تەننيسشىسى فينالدا پولشانىڭ وسى جاستاعى ءبىرىنشى راكەتكاسى يان پارادوۆسكيمەن كەزدەستى.

الماتى تەننيس مەكتەبىنىڭ تۇلەگى قارسىلاسىن 6:4، 6:4 ەسەبىمەن تىزە بۇكتىردى. جارىس بارىسىندا روبەرت بىردە-ءبىر سەتتە ۇتىلعان جوق.

جۇپتىق سىندا ر.كامينسكي ليتۆالىق مارك تۆەرسيمەن بىرگە فينالدا تارتىستى باسەكەدە بەلارۋس وكىلدەرى كوران – سۆيتلوۆقا ەسە جىبەردى. ەسەپ – 6:1، 4:6، 5:10.

روبەرت كامينسكي ءۇشىن بيىلعى جىل تابىستى بولدى. ول وسىمەن Tennis Europe سەرياسى بويىنشا جەكەلەي سىندا ءۇشىنشى تيتۋلىن جەڭىپ الدى. بيىلعى ماۋسىمدا امال سۇلتانبەكوۆتىڭ شاكىرتى 30 ماتچ وتكىزىپ، سونىڭ 26-سىندا جەڭىسكە جەتتى.

داستان كەنجالين،

استانا