قازاقستان العاش رەت وتەتىن United Cup تۋرنيرىنە قاتىسادى

29 جەلتوقسان – 8 قاڭتار ارالىعىندا اۆستراليانىڭ بريسبەن، پەرت جانە سيدنەي قالالارىندا العاش رەت United Cup كوماندالىق ءتۋرنيرى وتەدى.

بۇل دوداعا قاتىساتىن تەننيسشىلەر ATP جانە WTA رەيتينگىسىندە 500 ۇپايعا دەيىن يە بولىپ، تابىس قورىن تولىقتىرا الادى.

تۋرنيردە ەلىمىزدىڭ نامىسىن يۋليا پۋتينتسەۆا (№51)، جىبەك قۇلامباەۆا (جۇپتىق سىندا №202)، گوزال اينيتدينوۆا (جۇپتىق سىندا №392)، الەكساندر بۋبليك (№37)، تيموفەي سكاتوۆ (№142)، دەنيس ەۆسەەۆ (№292) پەن گريگوري لوماكين (جۇپتىق سىندا №205) قورعايدى.

ۆ توبىندا وتانداستارىمىز پولشا جانە شۆەيتساريا قۇرامالارىمەن سىنعا تۇسەدى. بۇل توپتاعى ويىنداردىڭ ءبارى بريسبەندە وتەدى.

قازاقستان ايەلدەر قۇراماسى پولشا تەننيسشىلەرىمەن بيللي دجين كينگ كۋبوگىنىڭ ىرىكتەۋ ساتىسىندا الداعى جىلدىڭ ساۋىرىندە استانادا دا وينايدى.

پولشا قۇرامىندا تۋرنيرگە مىنا تەننيسشىلەر قاتىسادى: يگا سۆەنتەك (№1)، حۋبەرت حۋركاچ (№10)، ماگدا لينەتت (№48)، كاسپەر جۋك (№245)، دانيەل ميحالسكي (№260)، اليتسيا روسولسكايا (جۇپتىق سىندا №32)، لۋكاش كۋبوت (№245).

شۆەيتساريا كومانداسىندا بەليندا بەنچيچ (№12)، ستەن ۆاۆرينكا (№148)، جيل تايحمان (№35)، مارك-اندرەا حيۋسلەر (№56)، يلەنا ين-البون (جۇپتىق سىندا №124)، دومينيك ستەفان شتريكەر (№118)، دجوان تسۋگەر (№188)، الەكساندەر ريچارد (№169) كورتقا شىعادى.

29 جەلتوقسان كۇنى العاشقى بولىپ يۋليا پۋتينتسەۆا وينايدى. ودان كەيىن كورتقا تيموفەي سكاتوۆ شىعادى. پۋتينتسەۆا شۆەيتساريالىق بەليندا بەنچيچپەن كۇش سىناسادى. ونىمەن بەس رەت كەزدەسىپ، ۇشەۋىندە جەڭگەن ەدى. سكاتوۆتىڭ قارسىلاسى – مارك-اندرەا حيۋسلەر.

داستان كەنجالين،

استانا