Бокс: Мырзағали Айтжановқа бас жаттықтырушы болуға ұсыныс түсті

Бокстан КСРО және Еуропа чемпионы Мырзағали Айтжановқа қайтадан Қазақстан ұлттық құрамасының бас жаттықтырушы болуға ұсыныс түсті. Ол жаңа жыл мерекесінен кейін  ұлттық құраманы қайта жаттықтыруы мүмкін.

Жаңа қызметке ұсынысқа Мырзағали Айтжановтың өзі келісім бергенін айтты.

«Басшылардан (Қазақстан бокс федерациясы, — ред.) сондай бір ұсыныс болды. Келісімім бердім. Әзірше бұйрықты әлі алған жоқпын», — деді ол.

Әзірге Қазақстан бокс федерациясы ресми хабарлаған жоқ. Тек жаңа жыл мерекесінен кейін бұйрық шығып, көпшілікке таныстырылуы мүмкін.

Осыған дейін ұлттық құраманы Қайрат Сәтжанов жаттықтырған болатын. Ол құраман тізгінін былтыр Токио Олимпиадасынан кейін ұстады. Одан кейін команданы Белградта өткен әлем чемпионатына бастап барды. Сербияда Қазақстан құрамасы екі алтын жүлдені жеңіп алды. Биыл ұлттық құрама Аммандағы Азия чемпионатына қатысты.

Ал Мырзағали Құланұлы Айтжанов 1970 жылы 13 қыркүйекте қазіргі Түркістан облысына қарасты Сайрам ауданындағы Қарабастау ауылында туған. Жастар арасында Кеңес Одағы кубогының күміс жүлдегері, КСРО және Еуропа чемпионы.

Айтжановтың тұсындағы ұлттық құрама Олимпия ойындарында  2 алтын, 3 күміс, 2 қола, әлем чемпионатында 5 алтын, 8 күміс, 7 қола, Азия ойындарында 8 алтын, 6 күміс, 4 қола, Азия чемпионатында 15 алтын, 7 күміс, 6 қола медальді жеңіп алды. Мырзағали Айтжанов әлемнің екі мәрте үздік жаттықтырушысы атанған. Ұлттық құрамаға 2009 – 2018 жылдары бас жаттықтырушы болды.

Дастан КЕНЖАЛИН,

АСТАНА