Пеленің жағдайы қиындап барады – БАҚ

Атақты бразилиялық футболшы Пеле отбасымен және достарымен қоштаса бастады. Өйткені, оның жағдайы өте нашар. Бұл туралы британдық кәсіпкер, спорт менеджері Франк Халид хабарлады.

«Пеле аурухана төсегінен отбасымен және достарымен қоштасады. Футбол аңызы Пеле қатерлі ісік ауруымен екі айдан беріп ауырып жатыр. 82 жастағы Пеле үшін қатерлі ісікпен күресу оңай болмай тұр. Отбасы оның жағдайы одан әрі нашарлап бара жатқанын айтады», — деп жазды ол Twitter-де.

Сондай-ақ, желіде Пелемен қоштасуға дайындық туралы бейне таратылды. Біріктірілген кадрларда бразилиялық спортшы бейнеленген үлкен алтын қорап бар. 24 желтоқсанда la Notícia басылымы хабарлағандай, Сантос қаласындағы Вила Белмиро стадионында табытқа ұқсас құрылым жиналады.

«Стадионда үлкен ақ шатыр орнатылды. Оның ортасында табыт тірегіне өте ұқсас құрылым бар. Пеленің фотосуреттері мен мүсіндері де келіп, шатырдың ішіне апарылады», — деп хабарлады басылым.

Пеленің денсаулығының нашарлағаны туралы 21 желтоқсанда оның емдеуші дәрігерлері хабарлады. Олар футболшының қатерлі ісігін емдеудегі теріс динамиканы көрсетті.

29 қарашада 82 жастағы Пеле жоспардан тыс ауруханаға жатқызылды. Оған жалпы дене ісінуі, соның ішінде декомпенсацияланған жүрек жеткіліксіздігі диагнозы қойылды.

Пеле Бразилия құрамасында үш дүркін әлем чемпионы атанған футболшы. Халықаралық футбол федерациясы оны ХХ ғасырдың үздік футболшысы деп таныды. Спортшының шын аты – Эдсон Арантис ду Насименту.

Ол ойыншы ретінде үш рет әлем чемпионы атанған әлемдегі жалғыз футболшы. Пеле 1958, 1962 және 1970 жылдары әлем чемпионы атағын алды. 1966 жылғы әлем чемпионатында Бразилия командасы топтан шыға алмады. Бразилия құрамасы үшін ол 92 матч өткізіп, 77 гол салды.

Нұрдәулет КЕНЖЕБАЙ,

АСТАНА