بوكس: مىرزاعالي ايتجانوۆقا باس جاتتىقتىرۋشى بولۋعا ۇسىنىس ءتۇستى

بوكستان كسرو جانە ەۋروپا چەمپيونى مىرزاعالي ايتجانوۆقا قايتادان قازاقستان ۇلتتىق قۇراماسىنىڭ باس جاتتىقتىرۋشى بولۋعا ۇسىنىس ءتۇستى. ول جاڭا جىل مەرەكەسىنەن كەيىن  ۇلتتىق قۇرامانى قايتا جاتتىقتىرۋى مۇمكىن.

جاڭا قىزمەتكە ۇسىنىسقا مىرزاعالي ايتجانوۆتىڭ ءوزى كەلىسىم بەرگەنىن ايتتى.

«باسشىلاردان (قازاقستان بوكس فەدەراتسياسى، — رەد.) سونداي ءبىر ۇسىنىس بولدى. كەلىسىمىم بەردىم. ازىرشە بۇيرىقتى ءالى العان جوقپىن»، — دەدى ول.

ازىرگە قازاقستان بوكس فەدەراتسياسى رەسمي حابارلاعان جوق. تەك جاڭا جىل مەرەكەسىنەن كەيىن بۇيرىق شىعىپ، كوپشىلىككە تانىستىرىلۋى مۇمكىن.

وسىعان دەيىن ۇلتتىق قۇرامانى قايرات ءساتجانوۆ جاتتىقتىرعان بولاتىن. ول قۇرامان تىزگىنىن بىلتىر توكيو وليمپياداسىنان كەيىن ۇستادى. ودان كەيىن كوماندانى بەلگرادتا وتكەن الەم چەمپيوناتىنا باستاپ باردى. سەربيادا قازاقستان قۇراماسى ەكى التىن جۇلدەنى جەڭىپ الدى. بيىل ۇلتتىق قۇراما اممانداعى ازيا چەمپيوناتىنا قاتىستى.

ال مىرزاعالي قۇلان ۇلى ايتجانوۆ 1970 جىلى 13 قىركۇيەكتە قازىرگى تۇركىستان وبلىسىنا قاراستى سايرام اۋدانىنداعى قاراباستاۋ اۋىلىندا تۋعان. جاستار اراسىندا كەڭەس وداعى كۋبوگىنىڭ كۇمىس جۇلدەگەرى، كسرو جانە ەۋروپا چەمپيونى.

ايتجانوۆتىڭ تۇسىنداعى ۇلتتىق قۇراما وليمپيا ويىندارىندا  2 التىن، 3 كۇمىس، 2 قولا، الەم چەمپيوناتىندا 5 التىن، 8 كۇمىس، 7 قولا، ازيا ويىندارىندا 8 التىن، 6 كۇمىس، 4 قولا، ازيا چەمپيوناتىندا 15 التىن، 7 كۇمىس، 6 قولا مەدالدى جەڭىپ الدى. مىرزاعالي ايتجانوۆ الەمنىڭ ەكى مارتە ۇزدىك جاتتىقتىرۋشىسى اتانعان. ۇلتتىق قۇراماعا 2009 – 2018 جىلدارى باس جاتتىقتىرۋشى بولدى.

داستان كەنجالين،

استانا