الەكساندر مەدۆەد: «قازاق كۇرەسى — ەڭ تازا كۇرەس»

جاقىندا مينسك قالاسىندا قازاق كۇرەسىنەن وتكەن الەم چەمپيوناتىندا اتاقتى الەكساندر مەدۆەدپەن از-كەم اڭگىمەلەسۋدىڭ ءساتى تۇسكەن ەدى. سول شاعىن سۇحباتتى وقىرماننىڭ نازارىنا ۇسىنۋدى ءجون كورىپ وتىرمىز.

الەكساندر مەدۆەد – ەركىن كۇرەستەن 3 دۇركىن وليمپيادا، 7 دۇركىن الەم جانە 3 دۇركىن ەۋروپا مەن 9 دۇركىن كسرو چەمپيونى، دۇنيەجۇزىلىك قازاق كۇرەسى فەدەراتسياسىنىڭ قۇرمەتتى پرەزيدەنتى.

بۇل كىسى بىزبەن اڭگىمەدە قازاق كۇرەسىنىڭ كۇرەس تۇرلەرىنىڭ اراسىنداعى ەڭ تازا، وتە ادەمى سپورت ءتۇرى ەكەنىن ايتتى.

–قازاق كۇرەسى — وتە ادەمى سپورت ءتۇرى. ونىڭ بولاشاعى زور. ۋاقىت وتە كەلە بۇل كۇرەس الەمدەگى بەدەلدى سپورتتىڭ قاتارىنا كىرەدى دەپ ويلايمىن. ول ءۇشىن وسىنداي جارىستاردى كوبىرەك وتكىزۋ كەرەك. بۇل جولعى چەمپيوناتقا 38 ەلدەن كوماندا قاتىسۋىنىڭ ءوزى قازاق كۇرەسىنىڭ دۇرىس باعىتپەن العا باسىپ كەلە جاتقانىن كورسەتەدى. رەسەي مەن بەلارۋس ەلىنىڭ اراسىنداعى ۆيزالىق رەجيمنىڭ وزگەرۋىنە بايلانىستى بىرنەشە ەلدىڭ پالۋاندارى ماسكەۋدەن بەرى جەتە الماي قالدى دەپ ەستىپ جاتىرمىن. ولار كەلگەندە قاتىسۋشىلار سانى بۇدان دا كوبىرەك بولار ەدى. ءبىزدىڭ بەلارۋس ەلى قازاق كۇرەسىنەن الەم چەمپيوناتىن ءبىر ەمەس، وسىمەن ەكىنشى رەت ۇيىمداستىرىپ وتىر. الەمدەگى ادەمى كۇرەستىڭ قۇرمەتتى پرەزيدەنتى رەتىندە سىزدەرگە اق جول تىلەي وتىرىپ، وسىلاي جەر-ءجۇزىنىڭ كەز-كەلگەن جەرىندە قازاق كۇرەسىنءىڭ تۋىن تىگىپ، ناسيحاتتاي بەرىڭىزدەر دەگىم كەلەدى. سول كەزدە جاقسى ناتيجەگە جەتۋگە بولادى، – دەدى ول.

سونىمەن بىرگە اتى اڭىزعا اينالعان اتاقتى پالۋان قازاقستاندا بىرنەشە رەت بولعانىن، استانا قالاسىنىڭ وزىنە قاتتى ۇناعانىن، ەگەر دەنساۋلىعى بولسا ەلىمىزگە تاعى دا كەلەتىنىن ايتتى.

–مەن قازاقستاندا بىرنەشە رەت بولدىم. سپورتتا جۇرگەندە قازاقتىڭ اتاقتى پالۋاندارىمەن كۇرەسكەنمىن. ونى وزدەرىڭىز دە جاقسى بىلەسىزدەر. سىزدەردە ابىلسەيىت ايحانوۆ دەگەن مىقتى پالۋان بولدى. وكىنىشتىسى، ونىڭ سپورتتا جولى بولمادى. ايتپەسە، وليمپيادا مەن الەمدىك سىنداردا مىندەتتى تۇردە توپ جاراتىن ەدى. ەكەۋمىز سپارتاكيادادا ءبىر-اق رەت كەزدەستىك. قالعان ۋاقىتتاردا قۇرامادا جۇرگەن كەزىمىزدە بىرگە جاتتىعىپ، سىيلاستىعىمىز جاقسى بولدى. سوسىن اقتوبەدە الەكسەي سەمكين دەگەن قۇرداسىم بار. جاقىندا مەنىڭ 80 جاس مەرەيتويىما كەلىپ كەتتى. ول كسرو حالىقتارى سپارتاكياداسىن ۇتقان. ءوزى مىقتى پالۋان بولاتىن. قازاق كۇرەسىنىڭ پالۋاندارىنا جانە وسى كۇرەستىڭ باسى-قاسىندا جۇرگەن ازاماتتارعا، ونىڭ ىشىندە قازاق كۇرەسىن وليمپياداعا كىرگىزەمىن دەپ جۇرگەن سەرىك توكەەۆكە تەك قانا ساتتىلىك تىلەيمىن!

مەنىڭ قازاقستانعا دەگەن قۇرمەتىم، قازاق حالقىنا دەگەن سىيلاستىعىم ەرەكشە. قازاقستاننىڭ جاڭا استاناسى دا جاقسى قالا ەكەن. ماعان استانا وتە قاتتى ۇنادى. ەگەر دەنساۋلىعىم تۇزەلسە، تاعى دا بارامىن دەپ وتىرمىن. سول كەزدە قازاق باۋىرلارىممەن تاعى كەزدەسەمىز، – دەدى اتاقتى مەدۆەد.

اڭگىمەلەسكەن

مۇساعالي تاسقاليەۆ