SportPress.kz Qazaqstan sport jańalyqtary
Jaqynda Mınsk qalasynda qazaq kúresinen ótken álem chempıonatynda ataqty Aleksandr Medvedpen az-kem áńgimelesýdiń sáti túsken edi. Sol shaǵyn suhbatty oqyrmannyń nazaryna usynýdy jón kórip otyrmyz.
Aleksandr Medved – erkin kúresten 3 dúrkin Olımpıada, 7 dúrkin álem jáne 3 dúrkin Eýropa men 9 dúrkin KSRO chempıony, Dúnıejúzilik qazaq kúresi federaııasynyń qurmetti prezıdenti.
Bul kisi bizben áńgimede qazaq kúresiniń kúres túrleriniń arasyndaǵy eń taza, óte ádemi sport túri ekenin aıtty.
–Qazaq kúresi — óte ádemi sport túri. Onyń bolashaǵy zor. Ýaqyt óte kele bul kúres álemdegi bedeldi sporttyń qataryna kiredi dep oılaımyn. Ol úshin osyndaı jarystardy kóbirek ótkizý kerek. Bul jolǵy chempıonatqa 38 elden komanda qatysýynyń ózi qazaq kúresiniń durys baǵytpen alǵa basyp kele jatqanyn kórsetedi. Reseı men Belarýs eliniń arasyndaǵy vızalyq rejımniń ózgerýine baılanysty birneshe eldiń palýandary Máskeýden beri jete almaı qaldy dep estip jatyrmyn. Olar kelgende qatysýshylar sany budan da kóbirek bolar edi. Bizdiń Belarýs eli qazaq kúresinen álem chempıonatyn bir emes, osymen ekinshi ret uıymdastyryp otyr. Álemdegi ádemi kúrestiń qurmetti prezıdenti retinde sizderge aq jol tileı otyryp, osylaı jer-júziniń kez-kelgen jerinde qazaq kúresiniń týyn tigip, nasıhattaı berińizder degim keledi. Sol kezde jaqsy nátıjege jetýge bolady, – dedi ol.
Sonymen birge aty ańyzǵa aınalǵan ataqty palýan Qazaqstanda birneshe ret bolǵanyn, Astana qalasynyń ózine qatty unaǵanyn, eger densaýlyǵy bolsa elimizge taǵy da keletinin aıtty.
–Men Qazaqstanda birneshe ret boldym. Sportta júrgende qazaqtyń ataqty palýandarymen kúreskenmin. Ony ózderińiz de jaqsy bilesizder. Sizderde Ábilseıit Aıhanov degen myqty palýan boldy. О́kinishtisi, onyń sportta joly bolmady. Áıtpese, Olımpıada men álemdik syndarda mindetti túrde top jaratyn edi. Ekeýmiz Spartakıadada bir-aq ret kezdestik. Qalǵan ýaqyttarda quramada júrgen kezimizde birge jattyǵyp, syılastyǵymyz jaqsy boldy. Sosyn Aqtóbede Alekseı Semkın degen qurdasym bar. Jaqynda meniń 80 jas mereıtoıyma kelip ketti. Ol KSRO halyqtary Spartakıadasyn utqan. О́zi myqty palýan bolatyn. Qazaq kúresiniń palýandaryna jáne osy kúrestiń basy-qasynda júrgen azamattarǵa, onyń ishinde qazaq kúresin Olımpıadaǵa kirgizemin dep júrgen Serik Tókeevke tek qana sáttilik tileımin!
Meniń Qazaqstanǵa degen qurmetim, qazaq halqyna degen syılastyǵym erekshe. Qazaqstannyń jańa astanasy da jaqsy qala eken. Maǵan Astana óte qatty unady. Eger densaýlyǵym túzelse, taǵy da baramyn dep otyrmyn. Sol kezde qazaq baýyrlarymmen taǵy kezdesemiz, – dedi ataqty Medved.
Áńgimelesken
Musaǵalı TASQALIEV
