اتى اڭىزعا اينالعان فۋتبولشى پەتر جەكوۆ ومىردەن ءوتتى

اتى اتىڭىزعا اينالعان فۋتبولشى، سوفيانىڭ تسسكا كومانداسى مەن بولگاريا قۇراماسىنىڭ شابۋىلشىسى پەتر جەكوۆ 79 جاسقا قاراعان شاعىندا ومىردەن ءوتتى.

پەتر (بولگارشا – پەتر، — رەد.) جەكوۆ 1944 جىلى 10 قازاندا بولگاريانىڭ حاسكوۆ وبلىسىنداعى كنيجوۆنيك ەلدى مەكەنىندە تۋعان. 2023 جىلعى 18 اقپاندا سوفيا قالاسىندا قايتىس بولدى.

پەتر جەكوۆ – ەۋروپانىڭ مەرگەن شابۋىلشىلارعا بەرىلەتىن «التىن بۋتسا» جۇلدەسىنىڭ 1969 جىلعى، «كۇمىس بۋتسانىڭ» 1970 جىلعى، «قولا بۋتسانىڭ» 1973 جىلعى يەگەرى. 1968 جىلعى وليمپيالىق ويىنداردىڭ كۇمىس جۇلدەگەرى. بولگاريا قۇراماسى ساپىندا 44 ماتچ وتكىزىپ، 25 گول سالعان،

ءبىزدىڭ ارامىزدان بولگاريا فۋتبولىنىڭ تاريحىنداعى ەڭ كەرەمەت سيقىرشى فۋتبولشىلاردىڭ ءبىرى پەتر جەكوۆ كەتتى. عاجايىپ شابۋىلشى، كومانداداعى ۇلكەن جۇرەكتى سەنىمدى جولداس، «التىن بۋتسانى» العان تۇڭعىش بولگار فۋتبولشىسى – ءبىز قالاي اسپەتتەپ مىنەزدەمە بەرگىمىز كەلسە دە، ونىڭ شىن كەسكىن-كەلبەتىن، تسسكا-نىڭ دامۋىنا قوسقان وراسان ۇلەسىنىڭ ولشەمىن تولىق سۋرەتتەپ بەرە الماس ەدىك، – دەپ جازدى Facebook-كە «ارمياشىلار» كلۋبىنىڭ مۇشەلەرى.

پەتر جەكوۆ الەمنىڭ ەڭ ۇزدىك فۋتبولشىلارى قاتارىندا 1971 جىلعى 27 مامىردا ماسكەۋدە وتكەن لەۆ ءياشيننىڭ قوشتاسۋ ماتچىنا دا قاتىستى. ول 2:2 بولىپ تەڭ اياقتالعان جولداستىق كەزدەسۋدىڭ 78-مينۋتىندا الەم قۇراماسى ساپىنان سوڭعى گولدى سالىپ، ەسەپتى تەڭەستىردى.

داستان كەنجالين،

استانا