قازاقستاندا جاڭا فۋتبول ليگاسى قۇرىلدى

ەلىمىزدە جاسوسپىرىمدەر ءۇشىن جاڭا QJ League قۇرىلدى، دەپ حابارلادى Halyq Uni تىلشىسى.

ءتۋرنيردىڭ ءبىرىنشى ماۋسىمىنا 18 جاسقا دەيىنگى 12 كوماندا قاتىسادى:

«استانا»;

«جاس قىران» (الماتى);

«قايرات» (الماتى);

«وڭتۇستىك» (شىمكەنت);

«ورداباسى» (شىمكەنت);

«اقسۋ» (پاۆلودار وبلىسى);

«اقتوبە»;

«اتىراۋ»;

«قايسار» (قىزىلوردا);

«كاسپي» (اقتاۋ);

«تاراز»;

«شاحتەر» (قاراعاندى).

QJ League-تە 2023 جىلعى ماۋسىمدا ماتچتار اپتا سايىن («ۇيدە-سىرتتا» فورماتىندا، بارلىعى 132 ماتچ) وتكىزىلەدى. بۇل فۋتبولشىلارعا كاسىبي فۋتبول تالاپتارىنا بەيىمدەلۋگە مۇمكىندىك بەرەدى.

جاڭا ليگانىڭ ماقساتى – ۇلتتىق قۇراماعا ساپالى رەزەرۆ دايىنداۋ. بۇل – ستراتەگيامىزدىڭ ءبىر بولىگى بولىپ سانالاتىن بالالار فۋتبولىن دامىتۋعا مۇمكىندىك بەرەتىن نەگىزگى جوبا. وسى ليگا ارقىلى ءبىز دارىندى بالالاردى دايىندايتىن جارىس جۇيەسىن قۇرامىز. وسىلايشا، جاستارعا كاسىبي فۋتبولداعى العاشقى قادامىن جاساۋعا مۇمكىندىك بەرەمىز، — دەدى قفف پرەزيدەنتى ادىلەت بارمەنقۇلوۆ.

قكفل جانە QJ League پرەزيدەنتى روحۋس شوح جاڭا ليگا تالانتتى جاس فۋتبولشىلار رەزەرۆىن قۇرۋعا مۇمكىندىك بەرەتىنىن اتاپ ءوتتى.

بالالار فۋتبولىنىڭ دامۋىنا جۇيەلى تۇردە قاراۋ كەرەك. ايتپەسە، وڭ ناتيجەگە جەتۋ قيىن. QJ League-نى قازاقستان فۋتبولداعى رەۆوليۋتسيا ىسپەتتى. جاستارىمىز 100% كاسىبي دەڭگەيدە ۇيىمداستىرىلاتىن تۋرنيرگە قاتىسادى. مۇنداعى ويىندار قازاقستان پرەمەر-ليگاسىنىڭ دەڭگەيىندە وتەدى. وسىلايشا، دارىندى، جاس فۋتبولشىلاردىڭ رەزەرۆىن قۇرامىز، — دەدى ول.

QJ League اياسىنداعى العاشقى ماتچ 22 ساۋىردە ساعات 17:00-دە «استانا ارەنا» ستاديونىندا بولادى.

داۋرەن ەربولات،

استانا