وتانداستارىمىزدى جەڭىسپەن قۋانتامىز – ياروسلاۆا شۆەدوۆا

تەننيستەن قازاقستان ايەلدەر قۇراماسىنىڭ كاپيتانى ياروسلاۆا شۆەدوۆا مەن كوماندا مۇشەسى يۋليا پۋتينتسەۆا باق وكىلدەرىنە بيللي دجين كينگ كۋبوگىنىڭ ىرىكتەۋ كەزەڭى اياسىندا پولشامەن وتەتىن ماتچ قارساڭىندا سۇحبات بەردى.

ياروسلاۆا شۆەدوۆانىڭ ايتۋىنشا، 14-15 ساۋىردە استانادا بولاتىن قازاقستان – پولشا ماتچىنىڭ ماڭىزى زور.

ءبىز ءوز ەلىمىزدە جارىسقا قاتىسىپ جاتقانىمىزعا قۋانىشتىمىز. پولشامەن ويىندا بارىمىزدى سالىپ، جەڭىسكە جەتۋگە تىرىسامىز. وتانداستارىمىزدى جەڭىسپەن قۋانتامىز. ارينە، ەل نامىسىن قورعاۋ ۇلكەن جاۋاپكەرشىلىكتى جۇكتەيدى. الدىن الا جەڭەمىز دەپ بولجام جاساۋ مۇمكىن ەمەس. قارسىلاس كوماندانىڭ قۇرامى قانداي بولاتىنىنا قاراماستان، ماتچقا ءتاستۇيىن دايىنبىز. ەكى جىل قاتارىنان استانادا ويناپ جاتقانىمىزعا قۋانىشتىمىز. ءبىز بيىل وتكەن جىلعى ناتيجەنى قايتالاعىمىز كەلەدى. قىزداردىڭ كوڭىل-كۇيى كوتەرىڭكى، كورتقا ۇيرەنىپ، ويىندارعا دايىندالىپ جاتىر. جاس تەننيسشىلەر وينايدى ما؟ دەگەن سۇراققا كەلسەك، ەڭ اۋەلى تاجىريبەلى تەننيسشىلەردى ويىنعا قوسامىز. ەگەر ءۇش ويىندا ماسەلە شەشىلسە، وندا ولاردىڭ بابىنا قارايمىز. بىزدە ءبارى دە جەكەلەي جانە جۇپتىق سىندا كورتقا شىعۋعا دايىندالىپ جاتىر، — دەدى شۆەدوۆا.

كەزدەسۋدە پۋتينتسەۆا توپىراق توسەنىشىندەگى ماۋسىمنىڭ باستالعانىن ايتتى.

توسەنىشتى تاڭداعان كەزدە بىزگە قايسىسى كوبىرەك قولايلى، سوعان سۇيەندىك. نەگىزى قانداي توسەنىش، قانداي كورت بولسا دا، ءبىز ءار جارىسقا تەزىرەك بەيىمدەلۋگە تىرىسامىز. دايىندىق ويداعىداي. كەشە جانە بۇگىن ەكى ساعاتتاي وينادىم. جاتتىعۋ كەشكە دە جالعاسادى. ءوز ويىنىن تابۋ ءۇشىن بىرەۋگە ءبىر، ەكىنشىسىنە ەكى نەمەسە ءۇش ساعات جەتكىلىكتى بولۋى مۇمكىن. اركىمنىڭ قارىم-قابىلەتى ءارتۇرلى. ەڭ باستىسى، جەڭىس ءۇشىن بارىمىزدى سالامىز، — دەدى ول.

پولشا كومانداسىنىڭ كاپيتانى داۆيد تسەلت قازاقستان كومانداسىنىڭ شەبەرلىگىن باعالاپ، قۇرامادا يگا شۆەنتەك پەن ماگدا فرەحتىڭ جوقتىعىن ايتتى.

ءبىز قازاقستانعا العاش رەت كەلىپ وتىرمىز. وسى ويىندا العا قويعان ماقساتىمىز بار. ارينە، ءبىزدىڭ تەننيسشىلەر قازاقستان سپورتشىلارىمەن يىق تەڭەستىرە باسەكەلەسكىسى كەلەدى. دەگەنمەن بۇل كوماندالىق ويىن بولعاندىقتان جەڭىسكە جەتۋگە بولادى. قارسىلاستارىمىز وسال ەمەس. وتە تاجىريبەلى كوماندا. ەلەنا رىباكينا، يۋليا پۋتينتسەۆا، اننا دانيلينا سياقتى ويىنشىلارمەن تەرەزەسى تەڭ ويناۋ – ءبىز ءۇشىن ۇلكەن قۇرمەت.

ءبىز قازاقستان قۇراماسىن جاقسى بىلەمىز. ەلەنا رىباكينانىڭ بابى تاماشا، شەبەرلىگى ارتىپ كەلەدى. ماعان ونىڭ ويىنى وتە ۇنايدى. يۋليا پۋتينتسەۆا – كۇش-جىگەرى مىقتى تەننيسشى، اسىرەسە، توپىراق توسەنىشىندە. اننا دانيلينا جۇپتىق سىندا وتكەن جىلى اۆستراليا چەمپيوناتىنىڭ فينالىنا دەيىن جەتتى. دەگەنمەن بۇل كوماندالىق جارىس بولعاندىقتان، ءبارى دە بولۋى ىقتيمال. قۇرامدا يگا مەن ماگدانىڭ جاراقاتىنا بايلانىستى بولماۋى بىزگە اناۋ ايتقانداي پروبلەما ەمەس. ءبىز بۇل جۇپتىڭ ءفاۆوريتى ەمەسپىز. سوندىقتان قىسىم كورسەتىلمەيدى. وسى باسىمدىقتى پايدالانىپ قالۋعا تىرىسامىز، — دەدى تسەلت.

استانادا وتەتىن قازاقستان – پولشا ماتچىنىڭ جەرەبەسى 13 ءساۋىر، بەيسەنبى كۇنى تارتىلادى.

داستان كەنجالين،

فوتو: قازاقستان تەننيس فەدەراتسياسى

استانا