Otandastarymyzdy jeńispen qýantamyz – Iaroslava Shvedova

Tennısten Qazaqstan áıelder quramasynyń kapıtany Iaroslava Shvedova men komanda múshesi Iýlııa Pýtıneva BAQ ókilderine Bıllı Djın Kıng kýbogynyń irikteý kezeńi aıasynda Polshamen ótetin match qarsańynda suhbat berdi.

Iaroslava Shvedovanyń aıtýynsha, 14-15 sáýirde Astanada bolatyn Qazaqstan – Polsha matchynyń mańyzy zor.

Biz óz elimizde jarysqa qatysyp jatqanymyzǵa qýanyshtymyz. Polshamen oıynda barymyzdy salyp, jeńiske jetýge tyrysamyz. Otandastarymyzdy jeńispen qýantamyz. Árıne, el namysyn qorǵaý úlken jaýapkershilikti júkteıdi. Aldyn ala jeńemiz dep boljam jasaý múmkin emes. Qarsylas komandanyń quramy qandaı bolatynyna qaramastan, matchqa tastúıin daıynbyz. Eki jyl qatarynan Astanada oınap jatqanymyzǵa qýanyshtymyz. Biz bıyl ótken jylǵy nátıjeni qaıtalaǵymyz keledi. Qyzdardyń kóńil-kúıi kóterińki, kortqa úırenip, oıyndarǵa daıyndalyp jatyr. Jas tennısshiler oınaıdy ma? degen suraqqa kelsek, eń áýeli tájirıbeli tennısshilerdi oıynǵa qosamyz. Eger úsh oıynda másele sheshilse, onda olardyń babyna qaraımyz. Bizde bári de jekeleı jáne juptyq synda kortqa shyǵýǵa daıyndalyp jatyr, — dedi Shvedova.

Kezdesýde Pýtıneva topyraq tósenishindegi maýsymnyń bastalǵanyn aıtty.

Tósenishti tańdaǵan kezde bizge qaısysy kóbirek qolaıly, soǵan súıendik. Negizi qandaı tósenish, qandaı kort bolsa da, biz ár jarysqa tezirek beıimdelýge tyrysamyz. Daıyndyq oıdaǵydaı. Keshe jáne búgin eki saǵattaı oınadym. Jattyǵý keshke de jalǵasady. О́z oıynyn tabý úshin bireýge bir, ekinshisine eki nemese úsh saǵat jetkilikti bolýy múmkin. Árkimniń qarym-qabileti ártúrli. Eń bastysy, jeńis úshin barymyzdy salamyz, — dedi ol.

Polsha komandasynyń kapıtany Davıd elt Qazaqstan komandasynyń sheberligin baǵalap, quramada Iga Shventek pen Magda Frehtiń joqtyǵyn aıtty.

Biz Qazaqstanǵa alǵash ret kelip otyrmyz. Osy oıynda alǵa qoıǵan maqsatymyz bar. Árıne, bizdiń tennısshiler Qazaqstan sportshylarymen ıyq teńestire básekeleskisi keledi. Degenmen bul komandalyq oıyn bolǵandyqtan jeńiske jetýge bolady. Qarsylastarymyz osal emes. О́te tájirıbeli komanda. Elena Rybakına, Iýlııa Pýtıneva, Anna Danılına sııaqty oıynshylarmen terezesi teń oınaý – biz úshin úlken qurmet.

Biz Qazaqstan quramasyn jaqsy bilemiz. Elena Rybakınanyń baby tamasha, sheberligi artyp keledi. Maǵan onyń oıyny óte unaıdy. Iýlııa Pýtıneva – kúsh-jigeri myqty tennısshi, ásirese, topyraq tósenishinde. Anna Danılına juptyq synda ótken jyly Avstralııa chempıonatynyń fınalyna deıin jetti. Degenmen bul komandalyq jarys bolǵandyqtan, bári de bolýy yqtımal. Quramda Iga men Magdanyń jaraqatyna baılanysty bolmaýy bizge anaý aıtqandaı problema emes. Biz bul juptyń favorıti emespiz. Sondyqtan qysym kórsetilmeıdi. Osy basymdyqty paıdalanyp qalýǵa tyrysamyz, — dedi elt.

Astanada ótetin Qazaqstan – Polsha matchynyń jerebesi 13 sáýir, beısenbi kúni tartylady.

Dastan KENJALIN,

FOTO: Qazaqstan tennıs federaııasy

ASTANA