SportPress.kz قازاقستان سپورت جاڭالىقتارى
بۇگىن الماتىدا ءوتىپ جاتقان باتۋتتاعى گيمناستيكادان VI جازعى سپارتاكيادانىڭ بىرقاتار باعدارلامادا چەمپيونى مەن جۇلدەگەرلەرى انىقتالدى. بۇل تۋرالى مادەنيەت جانە سپورت مينيسترلىگى سپورتتى دامىتۋ ديرەكتسياسى حابارلادى.
اكروباتيكالىق جولاقتا سەكىرۋدەن قىزدار اراسىندا كوماندالىق سىندا الماتى قالاسى توپ جارسا (60،6 بالل)، از عانا ۇپاي قالىپ كەتكەن قاراعاندى وبلىسى ەكىنشى ورىن (60،2) الدى. ۇزدىك ۇشتىكتى شىمكەنت قالاسىنىڭ (57،6) گيمناستارى تۇيىندەدى. بۇل باعدارلامادا ءار كوماندادا ءۇش سپورتشىدان ونەر كورسەتتى. ىرىكتەۋ ناتيجەسى بويىنشا فينالعا ءتورت كوماندا شىقتى.
وسىدان كەيىن كەزەك جەكەلەي سىنعا كەلدى. مۇندا ۆيتاليا سموتريكوۆا (شقو، 22،4 بالل) چەمپيون اتانسا، شىمكەنتتىك يانا گولوۆيتسكايا (21،5) كۇمىس جۇلدەگە قول جەتكىزدى. قولا ميلانا شۆابتىڭ (قاراعاندى، 21،1) ەنشىسىندە. سايىستىڭ بۇل تۇرىنە بارلىعى 16 گيمناستشى قاتىستى. ونىڭ جارتىسى جارتىلاي فينالعا، تاعى جارتىسى فينالعا جەتتى.
ال اكروباتيكالىق جولاقتا سەكىرۋدەن ەرلەر اراسىنداعى بۇگىنگى بارلىق مەدال شىمكەنت قالاسىنىڭ قورجىنىندا. تاجىريبەلى زۋحريتددين يماموۆ 24،8 بالل جيناپ، ۇزدىك ناتيجە كورسەتتى. ودان كەيىنگى ساتىعا مارات ساتتاروۆ (24،3) پەن الەكساندر روماحوۆ (23،7 بالل) جايعاستى. مۇندا 32 سپورتشى كۇش سىناستى. كوماندالىق باسەكە ەرتەڭ وتەدى.
باتۋتتا سەكىرۋدەن جەكەلەي سىندا ۇلتتىق قۇراما كوشباسشىسى دانيل مۋساباەۆ توپ جارىپ، قاراعاندى وبلىسىنىڭ كومانداسىنا العاشقى التىن مەدالدى سىيلادى. الدىڭعى، V جازعى سپارتاكيادانىڭ جەڭىمپازى بۇگىن كۇمىس مەدال العان رومان باركوۆ (شقو) پەن ەرلان تاسماعامبەتوۆتان (قاراعاندى) اجەپتاۋىر وزىپ كەتتى. وسى جاتتىعۋدا باس جۇلدەدەن ءدامىلى بولعان تاعى ءبىر ۇلتتىق قۇراما كوشباسشىسى پيرمامماد اليەۆ قاتەلىك جاساپ، سوڭعى ورىنعا ءتۇسىپ قالدى.
جاقسى بيىكتىك پەن جىلدامدىق العانمىن. ءبارىن ويداعىداي ىستەپ جاتقانىمدى ءبىلدىم. بۇل قاتتى كۇردەلى باعدارلاما ەمەس ەدى. الايدا اينالىم جاساپ، قايتا سەرپىلگەندە شەتكە كەتىپ قالدىم. قاي جەردە قاتە كەتكەنىمدى بىلەمىن. باپكەرمەن بىرگە بەينە قايتالاۋدى كورىپ، تاعى ساراپتاپ كورەمىز، — دەدى شىمكەنت قالاسىنىڭ اتىنان سىنعا تۇسەتىن پيرمامماد اليەۆ.
ايەلدەر اراسىنداعى باعدارلامادا پاۆلودار وبلىسىنىڭ وكىلى ۆيكتوريا بۋتولينا (51،830 بالل) قارسىلاس شاق كەلتىرگەن جوق. كۇمىس مەدال ونىڭ كوماندالاسى اناستاسيا افاناسەۆاعا بۇيىرسا، قولانى ەكاتەرينا كوجەمياكينا (قاراعاندى وبلىسى) جەڭىپ الدى. باتۋتتا سينحروندى سەكىرۋدەن جۇلدەگەرلەر ەرتەڭ بەلگىلى بولادى.
بۇگىنگى فينالدار لەگى قوس مينيترامپتاعى جەكەلەي جاتتىعۋمەن اياقتالدى. ايەلدەر اراسىندا ەكاتەرينا حوحلوۆا (21،900 بالل) وزىنەن 8 جاس ۇلكەن اناستاسيا افاناسەۆادان (21،700) ءسال عانا وزىپ، التىن مەدال الدى. قولا جۇلدەگەر شىمكەنتتىك مارينا تيتارەنكونىڭ ەنشىسىندە كەتتى (21،500). ەرلەر اراسىندا سوڭعى بولىپ سەكىرگەن يگور گراچەۆ (شقو، 24،500) باس جۇلدەنى قانجىعاسىنا بايلادى. مارات ساتتاروۆ (شىمكەنت، 24،00) كۇمىس، سۇڭقار ساۋن (پاۆلودار وبلىسى، 23،300) قولا جۇلدەگە يە بولدى.
ايتا كەتەيىك، قوس مينيترامپ، اكروباتيكالىق جولاق پەن باتۋتتا سەكىرۋدەن قالعان مەدالدار ەرتەڭ ساراپقا سالىنادى.
شامكەن بايىربەك،
استانا
