VI jazǵy Spartakıada: Danıl Mýsabaev óz ataǵyn qorǵap qaldy (FOTO)

Búgin Almatyda ótip jatqan batýttaǵy gımnastıkadan VI jazǵy Spartakıadanyń birqatar baǵdarlamada chempıony men júldegerleri anyqtaldy. Bul týraly Mádenıet jáne sport mınıstrligi Sportty damytý dırekııasy habarlady.

Akrobatıkalyq jolaqta sekirýden qyzdar arasynda komandalyq synda Almaty qalasy top jarsa (60,6 ball), az ǵana upaı qalyp ketken Qaraǵandy oblysy ekinshi oryn (60,2) aldy. Úzdik úshtikti Shymkent qalasynyń (57,6) gımnastary túıindedi. Bul baǵdarlamada ár komandada úsh sportshydan óner kórsetti. Irikteý nátıjesi boıynsha fınalǵa tórt  komanda shyqty.

Osydan keıin kezek jekeleı synǵa keldi. Munda Vıtalııa Smotrıkova (ShQO, 22,4 ball) chempıon atansa, shymkenttik Iana Golovıkaıa (21,5) kúmis júldege qol jetkizdi. Qola Mılana Shvabtyń (Qaraǵandy, 21,1) enshisinde. Saıystyń bul túrine barlyǵy 16 gımnastshy qatysty. Onyń jartysy jartylaı fınalǵa, taǵy jartysy fınalǵa jetti.

Al akrobatıkalyq jolaqta sekirýden erler arasyndaǵy búgingi barlyq medal Shymkent qalasynyń qorjynynda. Tájirıbeli Zýhrıtddın Imamov 24,8 ball jınap, úzdik nátıje kórsetti. Odan keıingi satyǵa Marat Sattarov (24,3) pen Aleksandr Romahov (23,7 ball) jaıǵasty. Munda 32 sportshy kúsh synasty. Komandalyq báseke erteń ótedi.

Batýtta sekirýden jekeleı synda ulttyq qurama kóshbasshysy Danıl Mýsabaev top jaryp, Qaraǵandy oblysynyń komandasyna alǵashqy altyn medaldy syılady. Aldyńǵy, V jazǵy Spartakıadanyń jeńimpazy búgin kúmis medal alǵan Roman Barkov (ShQO) pen Erlan Tasmaǵambetovtan (Qaraǵandy) ájeptáýir ozyp ketti. Osy jattyǵýda bas júldeden dámili bolǵan taǵy bir ulttyq qurama kóshbasshysy Pırmammad Alıev qatelik jasap, sońǵy orynǵa túsip qaldy.

Jaqsy bıiktik pen jyldamdyq alǵanmyn. Bárin oıdaǵydaı istep jatqanymdy bildim. Bul qatty kúrdeli baǵdarlama emes edi. Alaıda aınalym jasap, qaıta serpilgende shetke ketip qaldym. Qaı jerde qate ketkenimdi bilemin. Bapkermen birge beıne qaıtalaýdy kórip, taǵy saraptap kóremiz, — dedi Shymkent qalasynyń atynan synǵa túsetin Pırmammad Alıev.

Áıelder arasyndaǵy baǵdarlamada Pavlodar oblysynyń ókili Vıktorııa Býtolına (51,830 ball) qarsylas shaq keltirgen joq. Kúmis medal onyń komandalasy Anastasııa Afanasevaǵa buıyrsa, qolany Ekaterına Kojemıakına (Qaraǵandy oblysy) jeńip aldy. Batýtta sınhrondy sekirýden júldegerler erteń belgili bolady.

Búgingi fınaldar legi qos mınıtramptaǵy jekeleı jattyǵýmen aıaqtaldy. Áıelder arasynda Ekaterına Hohlova (21,900 ball) ózinen 8 jas úlken Anastasııa Afanasevadan (21,700) sál ǵana ozyp, altyn medal aldy. Qola júldeger shymkenttik Marına Tıtarenkonyń enshisinde ketti (21,500). Erler arasynda sońǵy bolyp sekirgen Igor Grachev (ShQO, 24,500) bas júldeni qanjyǵasyna baılady. Marat Sattarov (Shymkent, 24,00) kúmis, Suńqar Saýn (Pavlodar oblysy, 23,300) qola júldege ıe boldy.

Aıta keteıik, qos mınıtramp, akrobatıkalyq jolaq pen batýtta sekirýden qalǵan medaldar erteń sarapqa salynady.

Shamken BAIYRBEK,

ASTANA