اتىراۋ وبلىسىندا ۇلتتىق سپورت تۇرلەرىنىڭ دامىتۋ بويىنشا جيىن ءوتتى

بۇگىن اتىراۋ ۋنيۆەرسيتەتىندە قازاقستان رەسپۋبليكاسى ۇلتتىق سپورت تۇرلەرى قاۋىمداستىعىنىڭ ۆيتسە-پرەزيدەنتى تاستانبەك ەسەنتاەۆتىڭ قاتىسۋىمەن «اتىراۋ وبلىسىنداعى ۇلتتىق سپورت تۇرلەرىنىڭ دامۋى» تاقىرىبىندا جيىن ءوتتى، دەپ حابارلادى Halyq Uni تىلشىسى.

ءىس-شاراعا ۇلتتىق سپورت تۇرلەرىنەن اتىراۋ وبلىستىق فەدەراتسيا باسشىلارى، اعا جاتتىقتىرۋشىلار مەن ماماندار قاتىستى.

اتىراۋ وبلىستىق سپورت باسقارماسى باسشىسىنىڭ مىندەتىن اتقارۋشى نۇرجاۋعان تولەۋوۆا وبلىستاعى ۇلتتىق سپورت تۇرلەرىنىڭ دامۋى جونىندە بايانداما جاساپ، ستاتيستيكالىق مالىمەتتەردى جاريالادى. ونىڭ ايتۋىنشا، بۇگىندە وڭىردە ۇلتتىق سپورت تۇرلەرىمەن شۇعىلدانۋشىلار سانى 22 مىڭعا جۋىق ادامدى قۇرايدى.

سونداي-اق، جيىندا سالاداعى وزەكتى ماسەلەلەر تالقىلانىپ، ولاردى شەشۋ جولىنداعى ۇسىنىستار ايتىلدى.

ۇلتتىق سپورت قاۋىمداستىعىنىڭ ۆيتسە-پرەزيدەنتى تاستانبەك قۇتجان ۇلى الدا اتقارار جۇمىستارعا توقتالدى.

مەملەكەت باسشىسى قاسىم-جومارت توقاەۆ ۇلتتىق سپورتتى دامىتۋ تۇجىرىمداماسىن ازىرلەۋدى جانە ۇلتتىق سپورتىمىزدى وليمپيادالىق سپورت تۇرلەرىمەن تەرەزەسى تەڭدەي ەتىپ كوتەرۋ جايىن، سونىمەن قاتار كەلەسى جىلى ەلىمىزدە وتەتىن V-كوشپەندىلەر ويىندارىن وتە جوعارى دەڭگەيدە وتكىزۋ كەرەكتىگىن تاپسىرعان بولاتىن. وسى ورايدا، اتالمىش كونتسەپتسيانى ازىرلەۋ ءۇشىن، ۇلتتىق سپورتتاعى زاڭنامالار مەن ەرەجەلەرگە وزگەرىستەر ەنگىزۋىمىز ءۇشىن الىس-جاقىن شەتەلدەردەن جانە  ەلىمىزدىڭ بارلىق وڭىرلەرىنەن كاسىبي ءارى بىلىكتى عالىمدار مەن مامانداردى جۇمىلدىرىپ، جۇيەلى ءارى ساپالى جۇمىس ىستەيتىن بولامىز. وعان مىنا وتىرعان سىزدەر دە اتسالىسۋلارىڭىز ءتيىس. الدا ءبىزدى ۇلكەن جۇمىستار كۇتىپ تۇر. سول سەبەپتەن بارشاڭىزدى بىرلەسە جۇمىس ىستەۋگە شاقىرامىن، – دەدى تاستانبەك ەسەنتاەۆ.

شارا سوڭىندا جيىنعا قاتىسۋشىلار الداعى ۋاقىتتا ۇلتتىق سپورتتىڭ مارتەبەسىن كوتەرۋ جولىندا قويان-قولتىق جۇمىس ىستەۋگە كەلىسىپ، ناقتى جۇمىس جوسپارى ارقىلى بارلىق ماسەلەلەردى بىرلەسە شەشۋگە ۋاعدالاستى.

دينارا امانتاي،

استانا