Bokstan álem chempıonatynda О́zbekstan quramasyna ózgeris engizildi

1 mamyrda О́zbekstan Respýblıkasynyń astanasy -Tashkent qalasynda bokstan álem chempıonatynyń ashylý saltanaty ótti.

Onyń ashylý rásimi «Hýmo Arena» sport kesheninde bolyp, oǵan osy eldiń premer-mınıstri Abdýlla Arıpov, Halyqaralyq boks qaýymdastyǵynyń (IBA) prezıdenti Ýmar Kremlev, О́zbekstannyń Jastar saıasaty jáne sport mınıstri Adham Ikromov pen basqa da chempıonatqa jaýapty adamdar qatysty.

Osy kúni jarysqa álemniń 140 elinen kelgen bylǵary qolǵap sheberleri jerebe boıynsha qarsylastaryn anyqtap, qolǵap túıistirip úlgerdi. Qazaqstan quramasynan eki boksshy sharshy alańǵa shyqty. Onyń biri — 60 kelidegi Talǵat Syrymbetov, ekinshisi — 92 kelige deıingi salmaqtaǵy Aıbek Oralbaı. Ekeýi de qarsylastaryn utyp, kelesi 1/16 fınalǵa joldama aldy.

О́zbekstan quramasy da alǵashqy jekpe-jekterin ótkizdi. Olardyń sapynda sharshy alańǵa alǵashqy bolyp Mýjıbýllo Týrsýnov kóterildi. Ol 60 kg salmaq dárejesinde nepaldyq Sıngh Varınderdi utty. Budan basqa álem chempıonatynda О́zbekstannyń myna boksshylary rıngke shyǵady. Atap ótetin bir nárse, olardyń kóbisi áýesqoı bokstan kásipqoı boksqa aýysqan bylǵary qolǵap ıeleri.

Sonymen, 48 kelige deıingi salmaqta  Shadıerjon Melıkozıev ulttyq quramanyń sapyna qosyldy. Sonymen birge 2016 jylǵy Olımpıada chempıony, álem chempıonatynyń kúmis júldegeri, Azııanyń eki dúrkin chempıony, Azııa oıyndarynyń kúmis medalısi Hasanboı Dýsmatov álem chempıonatyna shaqyryldy. Ol 51 kelige deıingi salmaqta kúsh synasady. Odan basqa Aıbek Jýraev (-54 kg), Abdýmalık Halokov (-57 kg), Mýjıbıllo Týrsýnov (-60 kg), Rýslan Abdýllaev (-63,5 kg), Asadhýja Mýıdınhýjaev (-67 kg), Saıdjamshıd Jafarov (-71 kg), Alohon Abdýllaev (-75 kg), Jasýrbek Iýldoshev (-80 kg), Shahjahan Abdýllaev (-86 kg), Lazızbek Mýllojonov (-92 kg) pen 92 kelide asa salmaqtaǵy  Bahadır Jalolov qolǵap túıistiredi.

Búgin ekinshi jarys kúni 86 kelide óner kórsetetin Saǵyndyq Toǵambaı el namysyn qorǵap, kongolyq Mbelı Nlandýmen judyryqtasady.

Al 63,5 kelige deıingi salmaq dárejesinde Sanatáli Tóltaev ızraıldik Ahmad Shtıvımen kezdesedi. Ol keshki  saǵat 18.00-de bastalatyn sessııada óner kórsetedi.

Álem chempıonaty 14 mamyrǵa deıin bolady. Halyqaralyq boks qaýymdastyǵynyń (IBA) prezıdenti Ýmar Kremlev Reseıdiń «Gazprom» kompanııasynyń arqasynda bıylǵy álem chempıonatynyń júldegerleri qomaqty syıaqy alatynyn atap aıtty. Iaǵnı, IVA álem chempıonyna 200 myń dollar kóleminde aqshalaı syıaqyny tapsyrady. Al Qazaqstan boks federaııasynyń prezıdenti chempıon atanǵan boksshyǵa óz qarjysynan 100 myń dollar beredi.

Dastan KENJALIN,

ASTANA