بوكس: چەمپيوناتتا ءبىر بوكسشىمىز جارىس جولىنان شىعىپ قالدى (ۆيدەو)

وزبەكستاننىڭ استاناسىندا ەرلەر اراسىندا ءوتىپ جاتقان الەم چەمپيوناتىنىڭ ءۇشىنشى كۇنىندە ءبىر قازاقستاندىق جەڭىلىسكە ۇشىرادى. بۇل تۋرالى rast.kz حابارلادى.

بۇگىن 54، 60، 67، 71 كەلىگە دەيىنگى سالماقتارداعى اتلەتتەر ءوزارا كۇش سىناستى. شايقاستار كۇندىزگى جانە كەشكى سەسسيالار بولىپ، ەكىگە ءبولىنىپ وتكىزىلدى.

كۇندىزگى سەسسيا 14:00-17:00 ساعات ارالىعىندا، كەشكى سەسسيا 18:00-21:30 ساعات ارالىعىندا شارشى الاڭدى شايقادى.

بىزدەن 60 كەلىگە دەيىنگى سالماقتاعى تالعات سىرىمبەتوۆ قانا رينگكە شىقتى. قۇرامانىڭ دەبيۋتانتى، قاراعاندىلىق بوكسشى مۇنىڭ الدىنداعى 1/32 فينالدىق ىرىكتەۋ اينالىمىندا تاي ساكدا رۋامتحامدى 5:2 ەتىپ ۇتقان بولاتىن.

بۇدان الدىن حابارلاعانىمىزداي، تالعات 1/16 فينالدىق كەزەڭدە يوردانيالىق موحاممەد ابۋ دجادجەدپەن جۇدىرىقتاستى. قارسىلاسى قازىرگى ازيا چەمپيونى ەكەنىنە قاراماستان، ءبىزدىڭ وعلان جامان شايقاسقان جوق. ول ءبىرىنشى راۋندتا شابۋىلداۋمەن بولدى. دەگەنمەن، قاپتالداعى تورەشىلەردىڭ شەشىمى يوردانيالىق جىگىتتىڭ جاعىندا بولدى. ەكىنشى راۋندتا تالعات قارقىندى ءبىراز ارتتىردى. ونىڭ نوپىرىنە شىداماي، قايتا-قايتا قۇشاقتاي بەرگەن يوردانيالىق اربيتردان ەسكەرتۋ الدى. مۇنىڭ دا اسەرى بار شىعار، قازاقستاندىق بۇل جولى باسىم بولىپ شىقتى. ءسويتىپ، ءۇشىنشى راۋندتى ەكى اتلەت بىردەي مۇمكىندىكپەن باستادى. مۇندا تالعات قارقىنىنان تايعان جوق. الايدا تورەشىلەر دجادجەدتىڭ وزىق بولعانىن ايعاقتادى.

ەرتەڭ، 4 مامىردا 48، 63،5 كەلىگە دەيىنگى جانە 92 كەلىدەن اۋىر سالماقتاعى بوكسشىلار 1/16 فينالدىق، ال 51 كەلىگە دەيىنگى سالماقتاعى ساڭلاقتار 1/32 فينالدىق جەكپە-جەكتەرىن وتكىزەدى. بىزدەن ەكى بوكسشى شارشى الاڭعا شىعىپ، 1/16 فينالدىق شايقاستارىن وتكىزەدى. سونىڭ ىشىندە ءساناتالى تولتاەۆ ماۆريكيلىك ريچارنو كولين لۋيسپەن شايقاسسا، 92 كەلىدەن اۋىر سالماقتاعى قامشىبەك قوڭقاباەۆ رەسەيلىك الەكسەي دريۋنوۆپەن ۇستاسادى.

كۇندىزگى سەسسيا – ساعات 13:00-16:30، كەشكى سەسسيا ساعات 18:00-21:15 ارالىعىندا وتەدى.

سول ۋاقىتتاردا Qazsport تەلەارناسىنان تىكەلەي ەفيردە كورسەتىلەدى.