شىمكەنتتە بايگەدەن قازاقستان چەمپيوناتىنىڭ ەكىنشى كەزەڭى ءوتتى

بۇگىن شىمكەنت قالاسىنداعى يپپودروم الاڭىندا بايگەدەن قازاقستان چەمپيوناتىنىڭ ەكىنشى كەزەڭى ءوتتى، دەپ حابارلادى Halyq Uni.

ۇلتتىق سپورت تۇرلەرى قاۋىمداستىعى ءباسپاسوز قىزمەتىنىڭ مالىمەتىنشە، جارىستىڭ سالتاناتتى اشىلۋ راسىمىنە شىمكەنت قالاسىنىڭ اكىمى مۇرات ايتەنوۆ، قر ۇلتتىق سپورت قاۋىمداستىعىنىڭ ۆيتسە-پرەزيدەنتى تاستانبەك ەسەنتاەۆ، قر «بايگە» فەدەراتسياسىنىڭ پرەزيدەنتى قانات كوپباەۆ ارنايى قاتىسقان.

بايگە — حالقىمىزدىڭ قانىنا سىڭگەن سپورت ءتۇرى. بۇل قازاق حالقىنىڭ ۇلتتىق مادەنيەتىنىڭ وزىنە ءتان ەرەكشەلىگى. سوڭعى جىلدارى بۇكىل ەلىمىزدە ۇلتتىق سپورت تۇرلەرى، سونىڭ ىشىندە ات سپورتى جاقسى دامىپ كەلەدى. بۇگىندە رەسپۋبليكا بويىنشا اتبەگىلىك ونەرمەن، شاباندوزدىقپەن جانە ات باپتاۋمەن 20 مىڭعا جۋىق ادام اينالىسادى ەكەن. بيىل شىمكەنت قالاسىندا اشىلعان مىناۋ زاماناۋي اتشابار ۇلتتىق سپورتىمىزدىڭ ودان ءارى دامۋىنا ىقپال ەتەدى دەپ ويلايمىن، — دەگەن مۇرات دۇيسەنبەك ۇلى چەمپيوناتتىڭ ۇيىمداستىرۋشىلارىنا العىس ايتتى.

سونداي-اق، سالتاناتتى راسىمدە ءسوز العان قر ۇلتتىق سپورت قاۋىمداستىعىنىڭ ۆيتسە-پرەزيدەنتى تاستانبەك ەسەنتاەۆ ۇلتتىق سپورتىمىزدىڭ دامۋى مەن ونىڭ الەمگە ناسيحاتتالۋى مەملەكەت باسشىسى قاسىم-جومارت توقاەۆتىڭ ءجىتى نازارىندا ەكەنىن جەتكىزىپ، بۇگىنگى تاڭدا اتقارىلىپ جاتقان اۋقىمدى جۇمىستاردى اتاپ ءوتتى.

ال، «بايگە» فەدەراتسياسىنىڭ پرەزيدەنتى قانات كوپباەۆ جارىستىڭ ماڭىزدىلىعىنا توقتالىپ، شاباندوزدارعا ساتتىلىك تىلەدى.

چەمپيوناتتا رەسپۋبليكانىڭ بارلىق وڭىرلەرىنەن كەلگەن 120-دان استام تۇلپار باق سىنادى. قۇنان بايگە، توپ بايگە، الامان بايگەدە وزا شاۋىپ كەلگەن جۇيرىكتەرگە قوماقتى قارجىلاي سىيلىقتار تابىس ەتىلدى.

ايتا كەتەيىك، اتالمىش جارىس شىمكەنت قالاسى اكىمدىگىنىڭ قولداۋىمەن جانە ۇلتتىق سپورت قاۋىمداستىعى مەن «بايگە» فەدەراتسياسىنىڭ ۇيىمداستىرۋىمەن ءوتتى.

فوتو: ۇلتتىق سپورت قاۋىمداستىعى