قازاقستاننىڭ ءبىرىنشى، الەمنىڭ 6-راكەتكاسى ەلەنا رىباكينا العاش رەت ريم WTA 1000 ءتۋرنيرىنىڭ جارتىلاي فينالىنا شىقتى.
رىباكينا شيرەك فينالدا الەمنىڭ 1-راكەتكاسى، پولشا وكىلى يگا شۆەنتەكپەن وينادى. وسىعان دەيىن قارسىلاستار ءبىر-بىرىمەن ءۇش رەت كەزدەسىپ، سونىڭ ەكەۋىندە رىباكينا جەڭگەن ەدى.
كەزدەسۋدە ءبىرىنشى پارتيادا يگا شۆەنتەك 6:2 ەسەبىمەن ۇتتى. ەكىنشى سەتتە دە يگا 4:2 ەسەبىمەن الدا كەلە جاتتى. بىراق ەلەنا قايىرا برەيك جاساپ، تارازى باسىن تەڭەستىردى. سودان كەيىن تاي-برەيكتە 7:6 (7:3) ەسەبىمەن جەڭدى. ءۇشىنشى، شەشۋشى پارتيادا ەسەپ 2:2 بولعان كەزدە شۆەنتەك جاراقاتىنا بايلانىستى ماتچتى جالعاستىرۋدان باس تارتتى.
ەكى ساعات 19 مينۋتقا سوزىلعان ماتچتا رىباكينا 10 ەيس جاساپ، 1 برەيك-پوينتتى ءمۇلت جىبەرمەدى.
وسىلايشا، بيىل ەلەنا رىباكينا الەمنىڭ ءبىرىنشى راكەتكاسىن ءۇش رەت ۇتتى. ەندى رىباكينا فينالعا شىعۋ ءۇشىن الەمنىڭ 20-راكەتكاسى، لاتۆيالىق ەلەنا وستاپەنكومەن كەزدەسەدى. ول شيرەك فينالدا يسپانيالىق پاۋلا بادوسانى 6:2، 4:6، 6:3 ەسەبىمەن ۇتتى.
داستان كەنجالين،
استانا