فۋتبولدان قازاقستان قۇراماسىنىڭ جاڭا جەيدەسى تانىستىرىلدى (ۆيدەو)

قازاقستان فۋتبول فەدەراتسياسى جانە Errea Sport كومپانياسى ۋەفا-نىڭ قۇراما كوماندالار ءۇشىن جاڭا فۋتبول ەكيپيروۆكاسىن دايىنداۋ باعدارلاماسى اياسىندا ۇلتتىق قۇراما كوماندالارىنىڭ جاڭا ويىن جەيدەسىن تانىستىردى.

قفف-نىڭ حابارلاۋىنشا، بىلتىر قازاقستان فۋتبول فەدەراتسياسى مەن ۋەفا ۇلتتىق قۇرامالاردىڭ جاڭا فۋتبول ەكيپيروۆكاسىن دايىنداۋ مەن قامتاماسىز ەتۋ جونىندەگى كەلىسىمگە كەلگەن. كەلىسىم جاڭا، قايتالانباس وزىندىك ديزايندى جاساۋعا مۇمكىندىك بەرەدى.

بارلىق ەكيپيروۆكا دەنساۋلىققا جاعىمسىز اسەر ەتەتىن زاتتارعا قارسى ستاندارت ەنگىزگەن «100 وەكو-تەح» سەرتيفيكاتتاۋىنان وتكەن.

ويىن جەيدەسى ءۇش ءتۇرلى – ۇيدەگى (سارى)، قوناقتاعى (كوك) جانە قوسىمشا (قارا). ەكيپيروۆكانىڭ ديزاينى قازاقستانداعى ەڭ ۇلكەن سپورتتىق ديزاين جاساۋشى كومپانيا – Creeeon-نىڭ Errea Sport ماماندارىمەن بىرلەسۋى ارقىلى جاسالدى. پروتسەسس بارىسىندا ءبىز جانكۇيەرلەرىمىزدىڭ ويىن تىڭداپ، ۇلتتىق ناقىشتاعى بەينەلەر مەن سيمۆوليكالارعا داۋىس بەرۋىنە مۇمكىندىك بەردىك، — دەلىنگەن حابارلامادا.

قازاقستان ۇلتتىق قۇراماسى جاڭا جەيدەسىمەن العاشقى ويىنداردى ماۋسىم ايىندا سان-مارينو جانە سولتۇستىك يرلانديا قۇراما كوماندالارىنا قارسى وتكىزەدى.

داستان كەنجالين،

استانا