100 myń dollar: Boks federaııasy syıaqy tapsyrdy (VIDEO)

Búgin Almaty qalasynda Qazaqstan boks federaııasynyń prezıdenti Keńes Raqyshev О́zbekstannyń Tashkent qalasynda ótken álem chempıonatynda qurmet tuǵyrynan kóringen ulttyq quramanyń bylǵary qolǵap sheberleri men jattyqtyrýshylardy marapattap, syıaqy tapsyrdy, dep habarlady Boks federaııasy.

Kezdesýde Boks federaııasynyń basshysy ulttyq qurama komandanyń bes sportshysy men jattyqtyrýshylaryna jeke qarjysynan aqshalaı sertıfıkatty tabys etti.

Tashkentte álem chempıony atanǵan Sanjar Táshkenbaı, Mahmud Sabyrhan, Aslanbek Shymbergenov pen Nurbek Oralbaı 100 myń AQSh dollarymen marapattalsa, kúmis júldeger Dýlat Bekbaýovqa 50 myń AQSh dollary berildi. Sonymen qatar, Raqyshev Dýlat Bekbaýovqa qymbat shveıar saǵatyn da syılady.

Bul kúni boksshy qyzdar da marapattaldy. Úndistannyń Delı qalasynda ótken álem chempıonatynyń fınalısteri Karına Ibragımova men Lázzat Kúngeıbaeva Boks federaııasy basshysynan 30 myń AQSh dollaryn aldy. Qola júldegerler Alýa Balqybekova, Valentına Halzova men Farıza Sholtaı 10 myń AQSh dollary kólemindegi syıaqyǵa ıe boldy.

Quramamyzdyń jeńiske jetýine zor úlesin qosyp júrgen komanda ókilderi – jattyqtyrýshylar quramy, keńesshiler, keshendi ǵylymı top músheleri de nazardan tys qalmady.
⠀
Shtattaǵy jattyqtyrýshylar men jeke bapkerler, dárigerler, massaj jasaýshylar jáne basqa da mamandar 1 myńnan 15 myń AQSh dollary kóleminde syıaqy aldy.

Elimizdiń birneshe qalasynan arnaıy kelgen chempıondardyń analaryna Keńes Raqyshev 2 mıllıon teńgeniń sertıfıkatyn tapsyrdy.

О́zbekstan astanasyndaǵy tamasha nátıje úshin erler quramasynyń bas jattyqtyrýshysy Myrzaǵalı Aıtjanovqa 25 myń AQSh dollaryna qosa, kólik mińgizdi.

Jekeleı syılyqtardy eseptemegende, marapattaýdyń jalpy júlde qory 600 myń AQSh dollary boldy.

 

View this post on Instagram

 

A post shared by Kazakhstan Boxing Federation (@boxingkazakhstan)