Tennısten keıin bokspen de aınalysýym múmkin –Rybakına

Franııanyń ashyq chempıonatyna («Rolan Garros» týrnıri) qatysyp jatqan Qazaqstan quramasynyń taǵy bir ókili Elena Rybakına tennısten keıin sporttyń qaı túrimen aınalysýy múmkin ekenin aıtty. Ol jarysty aqparattyq jaǵynan qoldaýǵa barǵan jýrnalıst Asqar Aǵataevqa «Rolan Garros» týrnırindegi ekinshi jeńisinen keıin bolashaqta bokspen aınalysyp kóretinin atap ótti.

Rybakına chehııalyq Lında Noskovany utqannan keıin áýeli tennısshimen oıyn týraly pikir bildirdi.

Men byltyr onyń oıynyn kórgenmin. Ol hard tósenishinde jaqsy oınaıdy eken. Biz buǵan deıin esh ýaqytta birge jattyqqan emespiz. Jolymyz da túıisip kórmepti. Ol menimen jaqsy oınady. Ásirese, dopty jaqsy beredi eken. Maǵan ózimniń dop bergenin unaǵan joq. Solaı bolsa da jeńidim. Soǵan qýanyp otyrmyn, — dedi ol.

Odan keıin Rybakına boksshylardyń halyqaralyq arenada jaqsy jetistikke jetip jatqanyn, soǵan mysal retinde kásipqoı boksshy Gennadıı Golovkındi aıtyp, bolashaqta múmkin, sol sııaqty bokspen aınalysyp kóretinin jasyrmady.

Gennadııdi bilemin. Onymen eshqashan kezdesken emespin. Ol — keremet boksshy. Shynyn aıtqanda bokspen shuǵyldanyp kórmeppin. Bálkim, jattyǵyp kóretin shyǵarmyn.  Boks ta – jyldam qımyldy qajet etetin sport túri. Tennıste de boks sııaqty óte tez qımyldap, tez oılaý kerek. Jyldamdyq kerek. Múmkin, bokspen de aınalysyp kórermin. Bári múmkin, — dedi Rybakına.

Eske sala ketsek, Rybakına «Rolan Garros» týrnırin jaqsy bastap, úshinshi aınalymǵa shyqty. Sonymen birge Qazaqstannyń basqa tennısshileri de týrnırde jaqsy óner kórsetip jatyr.

Iýlııa Pýtıneva da úshinshi aınalymǵa joldama aldy. Sol sııaqty Aleksandr Nedovesov te alǵash ret juptyq synda «Rolan Garros» týrnıriniń úshinshi aınalymyna oınaıtyn boldy. Ol meksıkalyq Mıgel Anhel Reıes-Varelamen birge ekinshi aınalymda ýrýgvaılyq Arıel Behar men chehııalyq Adam Pavlashekti 6:4, 6:1 esebimen jeńdi.

Dastan KENJALIN,

ASTANA