شەجىرە كىتاپ جارىققا شىقتى

كۇنى كەشە استاناداعى ۇلتتىق كىتاپحانانىڭ ادەمى زالىندا وزگە كىتاپتاردان تابيعاتى بولەك كىتاپتىڭ تۇساۋكەسەرى بولدى. كىتاپتىڭ اتى — «ساڭلاق». زاتى اسىل ونەر سپورتتىڭ شەجىرەسى!

…وسىدان جەتى جىلعا تاياۋ ۋاقىت بۇرىن وسى كيەلى مەكەمەدە كەزىندە ەل اۋىپ كەتكەن ءبىر ۋىس قازاقتىڭ ۇلانى داۋرەن باقىتقاجى ۇلى «قىتايداعى قازاق سپورتشىلارى» دەگەن كتابىنىڭ تۇساۋكەسەرىن وتكىزىپ ەدى. سول جولى كىتاپتىڭ تۇساۋىن كەسىپ تۇرىپ، مىنا مەن: «داۋرەنجان، ەندى بۇكىل الەمدەگى بىرەگەي قازاق سپورتشىلارىن جيناپ،كىتاپ ەتىپ شىعارامىن دەپ جاتىرسىڭ. جاراتۋشىمىز سول كىتاپتىڭ تۇساۋكەسەرىندە بولۋعا جازسىن!»، — دەپ ەدىم. ارمان ورىندالدى. بۇل جولى داۋرەنتايدىڭ «ساڭلاق. الەم قازاقتارىنىڭ ۇزدىك سپورتشىلارى» اتتى كىتابىنىڭ تۇساۋى كەسىلىپ، وقىرماندارىنا جول تارتتى!

كىتاپقا الەمنىڭ 16 مەملەكەتىندە عۇمىر كەشىپ جاتقان 500-دەن اسا قازاق سپورتشىلارى ءتىزىپ بەرىلگەن. ينەمەن قۇدىق قازعانداي جانكەشتى جۇمىس! ەرەكشە ەڭبەك! تىڭ تۋىندى! مەنىڭ جانىما جاقىن كىتاپ! توزباس شەجىرە!!!

وكىنىشتىسى — بۇل كىتاپتى شىعارۋعا وتانىنا ابدەن باۋىر باسىپ تا بولماعان ۇلدىڭ ءوزى عانا جۇگىرىپ، نەبارى 350 دانا كىتاپ قانا شىعارا العان. ال، بۇل مەملەكەت قامقورلىعىمەن شىعىپ، ەلىمىزدىڭ بۇكىل وبلىسىنا مىڭداپ تاراپ، كۇللى ەلدىڭ كىتاپحانالارىنا 5-10 دانادان بەرىلەتىن-اق كىتاپ!

بۇگىندە اتتان ءتۇسىپ،ايقايدان اياڭعا اۋىسقان باسىم «وسى سالەمدى مادەنيەت جانە سپورت ءمينيسترى مەن ۆيتسە-مينيسترىنە، اقپارات جانە دامۋ مينيسترىنە جەتكىزۋگە» ۋادە عانا بەرە الدىم…

وسى ءبىر كىتاپتى قاراپ وتىرىپ، ەلىڭدە عانا ەمەس، نەبىر الىس شەت جەرلەردە ءجۇرىپ، قازاق بولا بىلگەن، قازاق بولعاندا دا اسىل قازاق بولا بىلگەن ۇل-قىزدارىمىزعا ريزا بولىپ، مۇنداي شەجىرە كىتاپ سپورتتان باسقا سالادا دا وسىلاي جيناقتالىپ، جارىققا شىعار بولسا، ۇلتىمىزدىڭ قانشاما ونەرلى ۇل-قىزىمەن تانىسار ەدىك دەپ، كوڭىل ورەكپىپ، جۇرەك جانىپ، بيلىك باسىنداعى بالا-باۋىرلارىمىزعا ءۇشبۋ سالەم جولداعان ءتۇرىم وسى!

نەسىپ جۇنىسباي ۇلى،

قازاقستاننىڭ ەڭبەك سىڭىرگەن قايراتكەرى

الماتى